Zirtirtu dah belh loh chuan sikul ṭan hunah ṭan tum lo

Mizo Students’ Union (MSU) Headquarters, Chawngte chuan Kamalanagar Higher Secondary School-ah zirtirtu an neih tlem avangin zirtirtu dah belh a nih loh chuan June 6, 2024-a sikul ṭan hunah ṭan ve loh tura an rêl thu an tarlang.

MSU tarlan danin, Kamalanagar HSS-a Education subject zirtirtu chu September 1, 2023-ah a pension a, tun thlengin a aiawhtu tur dah a la ni lo. Aiawhtu dah a nih loh avangin zirtirtu pension ta chu hlawh nei loin kumina HSSLC exam hma zawng a thawk zui a ni.

Kamalanagar HSS-a Economics zirtirtu pawh taksaah harsatna a neih avangin October 1, 2023 khan Zemabawk HSS-ah sawn a ni a, a aiawhtu tur tun thlengin dah a la ni lo.

Chawngte MSU chuan, Kamala­nagar HSS-ah Education leh Economics zirtirtu an neih loh avangin zirlaite'n harsatna an tâwk nasa a, result-in a tawrh phah hle niin an tarlang a; "June 4, 2024 ral hma ngeiin Education leh Economics lecturer dah turin sorkar kan ngen a, kan ngenna tihhlawhtlin a nih loh chuan MBSE-in sikul ṭan hun tura a ruat - June 5, 2024-ah Kamalanagar HSS zirlaite chuan sikul ṭan ve loh mai ni se kan ti," tiin an tarlang.