HSSLC 2024 Result Thlirna: Aizawl a sang ber, Lawngtlai a hniam ber

Higher Secondary School Leaving Certificate (HSSLC) Examination 2024-ah khan arts, science leh commerce-a zirlai exam zat leh pass zat aṭanga chhûtin Mizorama district 11 zingah Aizawl district-ah pass percentage a sang ber a, Lawngtlai district-ah a hniam ber.

HSSLC 2024-ah hian stream pathumah Aizawl district-ah zirlai tam berin, exam mi 6,239 zinga 5,242 an pass a, pass percentage 84.02 niin, district zingah pass percentage a sang ber. HSLC 2024-ah pawh Aizawl district hi pass percentage sanna ber a ni. HSSLC-ah Aizawl district hnaih bertu chu Mamit district a ni a, zirlai exam 219 zinga 180 (82.19%) an hlawhtling.

Aizawl district leh Mamit district hi HSSLC stream pathuma zirlai pass percentage sanna district a ni a; Aizawl district-ah science zirlai 78.12% leh commerce zirlai 90.72% pass-in, Mamit district-a arts zirlai 87.94% an pass a; arts, science leh commerce-a pass percentage sanna ber an ni.

Kumin HSSLC-ah hian Lawngtlai district-ah pass percentage 62.91% niin, a hniam ber. HSLC 2024-ah pawh district 11 zinga pass percentage hniamna ber leh 50% pass awm lohna awmchhun a ni bawk.