KHAWTHLIR

KTP-in thisen pe

KṬP, Jubili Branch, Mission Vengthlang chuan nimin khan an kohhran hall-ah thisen pek an huaihawt a, Synod Hospital tan thisen unit 32 an pe a, petute mipa 27 leh hmeichhia panga an ni.

Silai ken khap

Serchhip District Magistrate chuan CrPC Section 144 tlawhchhanin Serchhip district-ah silai ken chhuah khap a nih thu a puang. Lok Sabha inthlan puan a nih aṭanga vote chhiar zawh hnu chawlhkar khat a ral hma chu silai ken chhuah khap a nih thu leh thupek zâwm lote chu IPC Section 188 hmanga hrem theih an nih thu a tarlang. Thupek hian dan kengkawhtu sipai leh police a huam lo.

YMA jubilee lawm

YMA, Kanghmun South Branch chuan nimin khan an khaw community hall-ah an branch YMA kum 50 tlin, golden jubilee an lawm a, Serchhip district bawrhsap David Lalthantluanga'n hmanpuiin, jubilee lungphun a hawng. Jubilee lawmnaah hian khuallian bakah, Thenzawl DFO R Lalnungrenga leh Vantawng Group YMA president C Lalnunthara ten thu an sawi a ni.

Mission training

May 14, 2024 aṭang khan Missionary Training College (MTC)-ah Mizoram Synod hnuaia mission field-a field secretary leh field pastor-te tan Mission Orientation Course Training buatsaih mek a ni a, vawiinah zawh a ni ang. Training-ah hian mission field-a rawngbawlna atana pawimawh chi hrang hrang an inzirtir a ni.

MP vote chhiar turin inbuatsaih

Lok Sabha inthlanpuia vote tlate chhiar turin district hrang hrangah inbuatsaih mek a ni. Serchhip leh Lawngtlai district-ah May 22, Nilaini khan vote chhiarna tura hman tur khawlte endik a ni a, Hnahthial district-ah counting official-te first randomisation tih a ni. Lok Sabha inthlanpuia vote tlate hi India ram pumah June 4, 2024 khian chhiar a ni ang.