CM hoin Tuikual lui then fai a ni

Sports & Youth Services (SYS) department-a NSS Cell leh Save the Riparians bultumin nimin khan Ebenezer Medical Center bula Tuikual luia bawlhhlawh thenfai hnatlang, Mega River Cleaning Programme neih a ni a, chief minister Lalduhoma leh SYS minister Lalnghinglova Hmar ten an hnatlanpui.

CM Lalduhoma chuan, tun hmain Tlawng luiah lèn a den ṭhin thu a sawi a, "Tlawng lui bawlhhlawhzia hi hmân aṭangin ka hmu tawh a, rilrua kan lo mangan viau laiin hetiang hian mi tlawmngaite thawklehkhatah in lo lang a, in hnathawhte kan lo thlir ṭhin a, kan chhuang em em che u a ni," a ti.

Save the Riparians hma­laknain mipui leh sorkar a kaih harh thu sawiin Lalduhoma chuan, tun hma aṭanga hluihlâwn tawh plastic bawlhhlawh sâwngbàwlna chu tuaithar leh tura hma an lak mek thu te, Tuiriala bawlhhlawh paihna hmunah bawlhhlawh a tam tawh avangin sorkar hmasain Hualngohmun lama bawlhhlawh paihna hmun thar an ruahman chu ruahmanna thar nen an bawhzui dawn thu te, rei lo têah Aizawl khawpuiin bawlhhlawh paihna hmun thar a neih thuai a beisei thute a sawi.

Chief Minister chuan, Mizo pa a nih anga hnatlang ve a nih thu leh hnatlan ve chu khua leh tui a nih anga a mawhphurhna a nih thu a sawi a; Mizorama luite a faia a thianghlim zawk theih nan sorkarin ṭan a lak dawn thute a sawi bawk.

Sports & Youth Services minister Lalnghinglova Hmar chuan, Save the Riparians hnathawh chu chhuanawm a tih thu leh bul an ṭan dawnah a pisaah ruahmanna an siamho thu a sawi a, "A taka che chhuak mi an ni a, an inpekna hian kan ram tan rah ṭha tak a chhuah zel dawn a, kan bawlhhlawh paih dan leh kan lui enkawl danah hmasawnna thar leh mipui hnenah zirtirna ṭha an tuh a ni," a ti.

Lalnghinglova Hmar chuan, "Save the Riparian ho hnathawh ṭhat avang te, an inpekna avang te, an ṭhahnemngaihna leh a taka Zoram an hmangaih avangin tun hun hi kan thleng a ni," a ti a; an kal zelna turah duhsakna a hlan.

Tlawng lui fintu Tuikual luia bawlhhlawh thenfai hnatlang hi Save the Riparians Phase-II hnuaiah neih a ni a, zirna-in 10 aṭangin NSS volunteer mi 500 vel an thawk chhuak. Bawlhhlawh tam tham tak an chhar khawm a, Tuiriala bawlhhlawh sâwng­bàwlna hmunah an paih a ni.