Fûr atana inbuatsaih nan ṭhukhawm; Chhiatna thlenga che vat thei turin inchah

Disaster Management & Rehabilitation (DMR) department-a thawktute chu nimin khan Secretariat conference hall-ah DMR minister K Sapdanga hoin an ṭhukhawm a, fûr laia chhiatna thleng palh thei hmachhawn dan tur an sawiho. Minister chuan, chhiatna thleng palha che nghal vat thei tura inbuatsaih turin official-te a chah.

K Sapdanga chuan, fûrpui a inṭan dawn tih sawiin, "Eng harsatnain nge min tlâkbuak dawn kan hre lo. District Disaster Management Authority-a kan chairman DC-te lo inbuat­saih lawk u la, chhiat­na leh harsatna a lo thlenin chawp leh chilha che nghal vat thei turin ka chah che u a ni. A hun taka chêt loha nghah khawtlai hian harsatna tam tak a siam belh thei tih hriat reng a ṭha ang," a ti.

DMR Minister chuan, chawlh lai a ni emaw, ni lo emaw, eng hunah pawh tawrhna thleng endik vat a, an tawrh dan hriat chian thuai a ṭul tih sawiin, "State Di­sas­ter Respon­se Fund aṭanga ṭan­puina awm thei ang ang ngaihtuah a, a dawng àwm chhungkuate pek vat ṭhin ni se," a ti a; state sorkar chu chhiatna tâwkte pui nghal thei turin an inpeih reng thu a sawi.

District tinte'n a ṭul veleha hman tur sum an kawl mek bâkah, rang takin sum pek belh an nih thu sawiin Sapdanga chuan, "A ṭûl huna fund sem tur in neih loh hlaua state administration lam kan lo ṭan viau laiin, district ṭhenkhat chu in che muang viau tihte kan lo hria. Chutih laiin, a hun taka chê a, puih ngaite hnena fund pe nghalte avangin kan CM pawhin kan department chungah lawmthu min hrilh hial a ni," a ti.

DMR Minister chuan, tun hnaia thlipui, ruah leh rial vanga in tam tak a chhiatnaah, khaw ṭhenkhatah chuan rangva lei turte a awm mai lo tih sawiin, "A ṭhenin sorkar thu pawh nghâk hman loin mahni khuaa awm ang ang an lo la bawrh bawrh a ni," a ti a; khawchin hriat a nih loh avangin sorkar chu rangva eng emaw zat a lo inrálrin lâwk thu a sawi.

Fûrpui a thlen hunah eng anga nasain nge thli, ruah leh rialte a thawh dawn tih hriat a ni lo tih sawiin K Sapdanga chuan, "Leimin kan ngah viau dawn em tih a hriat lâwk theih loh. Lîr lo nghîng palh ta se, buaina leh harsatna a thlente engtin nge kan lo hmachhawn ang a, engtin nge hma kan lo lâk lâwk ang tih sawiho a ṭul," a ti.

DMR Minister chuan, fûrpui thleng turin harsatna a thlen theihte ngun taka ngaihtuah a ngai tih sawiin, "District tinte kan awmna hmun a inang lo a, harsatna kan tawh dan pawh a inang kher lo," a ti a; hmun tam takah tui a len ṭhin avangin invên leh lo hmachhawn dan turte ruahman lâwk a ṭul thu a sawi.