Kuhva tawlhrûk chungchang CBI chhuitir turin sorkar ngen

Hachhek Bial Kuhva Chingtu Pawl (HBKCP) chuan thuchhuah siamin, Mizoramah ram dang kuhva ro dan loa tawlhrûk man a la awm reng avangin kuhva tawlh rute dang turin an duty leh dawn tih an puang a; kuhva tawlhrûk chungchang CBI chhuitir turin Mizoram sorkar an ngen.

Dan loa kuhva rah tawlh­­rûk a tàwp theih HBKCP chuan hma an lo la tawh ṭhin a, hun eng emaw chen an huam chhungah kuhva tawlh­ruk an lo chang tawh a, kuhva ro tawlhrûk eng emaw zat an lo man tawh.

Customs, Assam Rifles, Mizoram Police leh kut hnathawktu duty-te'n kuhva tawlhruk an la man reng avangin kuhva tawlhrûk chângin an huam chhungah an duty thar leh dawn a, an huam chhunga kal lo turin kuhva tawlh ru ṭhinte an chah.

Dan loa kuhva ro tawlh chungchanga Vanramchhuangi’n Gauhati High Court-a PIL a thehlut chu lawmawm an tih thu sawiin HBKCP chuan, "Thubuai hi CBI chhui tura a ngenna High Court-in a pawm ngei kan beisei laia Mizoram sorkarin CBI chhuitir lo a, Mizoram Police chhuitir tura High Court-ah ngenna a siam hi pawi kan ti a, kuhva chíngtute hmakhua a ngai tâwk loah kan ngai," an ti a; kuhva ro tawlhrûk chungchang chu CBI chhui remti turin Mizoram sorkar an ngen.

HBKCP chuan, kuhva tawlhrûk PIL chungchanga Gauhati High Court Division Bench-in January 22, 2024-a thupek a chhuah chungchangah, "Kum 2021-a FIR thehluh tawh tun thlenga register a nih loh chhan sawifiah tura a tih te, case thara register theih a nih thu a sawite bawhzui a, Court-in sorkar chu he case hi a ngai thutak tâwk lo a tihte hi a pawi kan ti. Kuhva chíngtute tan huai taka dinga hma la turin Mizoram sorkar kan phûtin kan ngen a ni," an ti.

Kuhva tawlhrûk dangchat turin Mizoram sorkar tharah beiseina sang tak an nei tih sawiin HBKCP chuan, "Sorkar hmalak tum dan leh hmalak chhoh dan pawh lawmawm kan ti hle. Sorkarin theihtawp a chhuah meka kan hriat laiin, kuhva ro tawlhte hian an tih dan pangngaiin an la tawlh ru reng niin kan hria," an ti.

HBKCP chuan, Mizoram sorkarin thlai ṭhenkhata mini­mum support price a siam turah kuhva telh ve ngei turin sorkar an ngen tih an tarlang bawk.