CAA avangin Mizo mipui an him lo - MPCC General Secretary

Congress party chuan nimin khan Congress Bhavan-ah political session an nei a, thu sawitu John Siamkunga, MPCC general secretary chuan, Citizen (Amendment) Act (CAA) avangin Mizo mipui an him lo hle niin a sawi.

John Siamkunga chuan, BJP sorkar rorel dan ngun taka zir chian a ngaih thu sawiin, "Mizo mipuite'n kan duh loh em em CAA min pass luihpui a, CAA avangin Mizo mipui nuai 12 vel lek hi kan him lo hle. Tunah pawh Uniform Civil Code kan hmang dawn tiin BJP hruaitute chuan langsar takin thu an sawi," a ti. BJP sorkarin journalist-te an thunun mek nia sawiin, BJP-te'n rorelna an chang chhunzawm a nih chuan India rama hnam tlem zawk leh sakhaw tlem zawkte dinhmun a derthâwng hle a ni," a ti.

Kaladan Multi Modal Transit Transport Project chu India tana thil ṭangkai tak, sumdawnna luhka tur ni mah se, a hmang ṭangkai tak taktu zingah Mizo an tel phâk ang em tih ngaihtuah a ṭul thu sawiin Siamkunga chuan, "Vaivut khu chauh hi kan chan tâwk a ni mai ang em, tih hi ngun taka kan ngaihtuah a ngai," a ti a; mipui tana policy ṭha, retheihna ata chawi chhuak thei tur ngaihtuah a ngaih thu a sawi.

MPCC general secretary dang PC Laltlansanga pawhin thu sawiin, tun hnaia HSLC leh HSSLC result ṭha thawkhat mah se, Mizoram zirnain thiamna tak tak a pe em tih ngaihtuah a ṭul thu a sawi a, "MA, MSc-te leh mithiam tam tak nia kan ngaihte hian an degree phû tâwk hna thawh tur an hmu lo. Political party tin hian kan ṭhalaiten hnathawh tur an hmuh theihna tura policy kan duan a hun tawh," a ti.

PC Laltlansanga chuan, ZPM sorkar chu development bank din tura an intiamna an tihhlawhtlin a, a pung awm loa ṭhalaite'n loan an lak theih hun tur leh nakuma sawhthing leh hmunphiah man zat turte a zawt bawk.