ZPM sorkarin mipui beisei an pha lo - MNF Adviser

MNF party chuan nimin khan an pisa Mizo Hnam Runah chhung inkhawm an nei a; thu sawitu TC Pachhunga, MNF adviser chuan, ZPM sorkarin mipui beisei an pha lo nasa a, a bilhah a tho lo niin a sawi.

TC Pachhunga chuan, ZPM sorkarin cheng vaibelchhe tam tak sum an pûk tawh laiin SASCI sum an tikîr a, thlai thar lei nan financial year liam taah cheng vbc. 110 an dah laiin an lei lo tih a sawi a, "ZPM sorkar hi a bilhah a tho lo nasa em em a, an insawi ang an ni lo a, mipui beisei an pha lo nasa em em a ni," a ti.

Chief minister Lalduhoma'n ráltlân chungchangah sorkar laipui a thilphal thu a sawi laiin, RTI Act chhannaa a lan danin central-in raltlan chhawmdawlna sum a la pe lo niin TC Pachhunga chuan a sawi a; "Thla nga an sorkar tawh chhung hian tlatluma an insawina central sorkar aṭangin cheng khat pawh an rawn sawi chhuah sawi tur a la awm lo," tiin, MNF sorkarin zahawm takin raltlante a tuamhlâwm thung niin a sawi.

MNF Adviser chuan, Home minister K Sapdanga'n thla khat chhungin kuhva rah tawlh rûk tihtawp a nih tur thu a sawi tih sawiin, "An titàwp lo nasa em em a, High Court aṭangin insawifiah turin an ti ta hial zawk a ni," a ti.

TC Pachhunga chuan, sorkarin ZPM mi leh sa hlir work supervisor atan an ruat nia sawiin, "Contract hna an thawk mup mup mai. Leiman nasa takin an tipung," a ti bawk.