Mipui tibeidawngah sorkar tawhte puh

BJP, Mizoram Pradesh president Vanlalhmuaka chuan, Mizorama sorkar­na chelh tawhte'n manifes­to nei ṭha mah se, an tih­hlawh­tlin theih loh avangin chhuanlam tur an zawng ṭhin a, mipui an tibei­dawng ṭhin niin a sawi.

Vanlalhmuaka hian nimina an pisaa BJP political session-ah thu sawiin, "Kan sorkar hrawn tawhte kal hmang en hian time pass nana sorkarna siam mai mai an ang ṭhin. Manifesto nei ṭha hle mah se, tihhlawhtlin theih loh avanga chhuanlam tur zawng reng ṭhin sorkar kan hrawn ṭhinte hian Mizoram mipui min tibeidawng a, kan ram leh hnam hian a tawrh phah hle niin a lang," a ti.

BJP chu Hindu party tia miin an sawi ṭhin chung­changah Vanlal­hmuaka chuan, "Vawiin thleng hian BJP president ni tawhte leh hruaitute hian chal kan hnawih sen ve ngai lo a, coconut kan sawh keh ngai hek lo. Hindu party-a min puhtu Congress party hotupa erawh chuan chal a hnawih sen a, coconut sawh kehin Durga pathiannu hmaah Hindu serh leh sâng a khawih," a ti a; BJP beitute'n Mizo­ram an hmangaih lo a, poli­tics chu eizawn nan an hmang niin a sawi.

Mizoram BJP President chuan, "Party ṭhenkhat, party dang manifesto ruksak a, mahni tih ang maia kalpui ṭhin an awm a, BJP chuan party dang manifesto a rûksak ve ngai lo," a ti bawk.