Phai aṭangin vawksa kan la lut lo - PIGFED

Mizoram Pig Producers' Cooperative Federation (PIGFED) Limited Management Committee chuan thuchhuah siamin, phai aṭangin vawksa (frozen pork) an la lut lo niin an tarlang.

PIGFED chuan, Mizoran Pig Farnmers Association (MIPFA)-in PIGFED chu phai aṭanga frozen meat chawluttu emaw tia ràl aṭanga an beih ṭhin chungchangah April 15, 2024 khan MIFPA hruaitute nen an inkawm thu an tarlang a, "Frozen meat kan lak luh loh thu te, chhiat kan tawh ve tawh avangin dinhmun siam tuma kan hmalakna zingah frozen pork chawluttu (stockist)-te hnen aṭanga lain kan zuar chhâwng ve ṭhin a, chu pawh chu hma thar lâk kan tum avangin mumala kan kalpui tawh loh thu kan hrilh," an ti.

An inkawmhonaah boruak ṭha taka an inthlah hnuah an rin loh leh beisei loh takin May 20, 2024-ah MIFPA-in PIGFED dawr kawtah frozen vawksa an hâl tih sawiin PIGFED chuan, "Nasa takin media-ah an vawrh darh ta mai a, hei hian min thamlohzia leh kan inkawmhona khan awmzia a neih lohzia a tichiangah kan ngai a, pawi kan tiin kan hrethiam lo tak zet," an ti a, tun hnuah thleng tawh lo se an duh thu an sawi.

PIGFED chuan, vawk vulhtute tan theihtawpin hma an la reng nia sawiin, farm din thar lehin vawk ṭhahnem tak an thar mek thu te, ran vulhtute tan tualchhunga siam ran chaw ṭha leh tláwm an zawrh mek thu te, Aizawl leh a chhehvela vawkpui vulhtute kal chilhin artificial insemination technology hmangin vawk kah rai hna an thawh reng thu te, April 2023 aṭanga March 2024 inkara vawk kah rài aṭangin vawk note 41,299 thar a nih thute an tarlang bawk.