Kuminah Mizoramah ASF kaihhnawihah vawk 1,024 thi tawh, 1,623 suat tawh
African Swine Fever (ASF) vangin Mizoramah kumin chhungin vawk 1,024 a thi tawh a, vawk 1,623 suat a ni tawh a, ASF kaihhnawiha vawk thi zawng zawng chu 2,647 a ni. Nimin bikah ASF vangin vawk 197 suat a ni a, vawk 63 a thi.
AH&Vety department chhinchhiah chinah, January 1, 2024 aṭanga nimin thleng khan khua/veng 60-ah ASF a léng tawh a, chu'ng zinga 48 (80%) chu Aizawl district chhung a ni. ASF vangin Mizoramah vawk 1,024 a thi tawh a, vawk hri darh zel tur vên nan vawk 1,623 suat a ni tawh a, ASF kaihhnawiha kumina vawk thi zawng zawng chu 2,647 a ni.
Aizawl district-ah May 23, Ningani thleng khan vawk hri lênna 42 a awm a, nimin khan paruk awm belhin, a vaiin khua/veng 48-ah ASF vangin vawk thi 609 leh suat 1,258 a awm a, a vaiin 1,867 a ni. Mizoram puma vawk thi leh suat belhkhawm 2,647 aṭanga chhûtin Aizawl district-a vawk thi leh suat hi 70.53% a tling.
Nimin Vanglaini chhuaka January 1 - May 23, 2024 thlenga ASF vanga Mizorama vawk thi zat 1,922 leh vawk suat zat 2,630 tia tarlan chu tihsual palh a ni a; January 1 - May 23, 2024 thlenga vawk thi zat chu 961 niin, vawk suat zat chu 1,315 a ni.