Compartmental & improvement exam June 19, 2024-ah buatsaih a ni dawn
Mizoram Board of School Education (MBSE) chuan HSLC leh HSSLC examination 2024-a compartmental chance nei leh improvement atana subject mal exam ṭha duh tan June 19, 2024-ah exam a buatsaih dawn a; May 31, 2024 thleng Centre Superintendent hnenah exam dilna leh fee pek theih a ni.
HSLC Examination 2024-ah khan compartmental chance nei zirlai 62 leh HSSLC-ah 52 an awm. Kumin HSLC leh HSSLC exam-a pass zinga hmasawn lehzual inbeiseia exam ṭha leh duh tan an duh ber subject pakhatah improvement exam neih phal a ni bawk.
Compartmental exam leh improvement exam hi June 19, 2024 khian district khawpui tina centre pakhat ṭheuhah buatsaih a ni dawn a; passport size thlalak pakhat leh fee nen May 31, 2024 thleng Centre Superintendent hnenah dilna thehluh theih a ni. Hun bithliah chhunga dilna thehlut hman lo tan late fee pein June 5, 2024 thleng ngaihhnathiamna hun hawn a ni.
Vanglaini zawhna chhangin MBSE chairman JH Zoremthanga chuan, compartmental exam leh improvemnet exam chu a inan loh thu a sawi a, "Compartmental exam chu fail zinga pass theihna chance nei ṭha ho puala buatsaih a ni. Improvement chu pass zinga an mark hmuha duhthusam lo, an mark hmuh tlemna subject pakhata exam ṭha duh tan a ni a, subject pakhat chauh exam ṭhat phal a ni," a ti a; zirlai exam nawn lehte'n zirna an chhunzawmna turah harsatna an tawh loh nan result tihchhuah thuai an tum thu a sawi bawk.