Sumdawnna lirthei ni 3 an nuar tawh Sorkarin service ṭan nghal turin hriattir

Commercial Vehicle Joint Action Committee (CVJAC) chuan nimin khan a ni thumna atan lungawi lohna an lantir chhun-zawm leh a, sumdawnna lirtheite an tlan chhuak lo. Sorkar aṭanga thu lawmawm an la dawn loh avangin nawrhna hi vawiinah pawh chhunzawm zel an la tum nia thu dawn a ni. Hetih lai hian, sorkar chuan commercial vehicle-te chu service ṭan leh nghal turin a hriattir.

Sumdawnna lirtheite ni thum chhung an nawrh tak avang hian Aizawl leh khaw ṭhenkhatah mipuite'n harsatna an tawk ṭan mek a; Mizoram pawn leh thingtlang
aṭangin thlai chi hrang hrang a luh belh loh avangin Aizawlah chuan bazar hrang hrangah chawhmeh thlai lei tur a awm mang tawh lo.

Phai lam aṭanga petrol leh diesel phurtu tanker-te an tlan loh avangin Aizawlah chuan filling station-te'n petrol leh diesel an nei tlem tawh a; pump tam berah chuan an free sale tawh lo a, coupon neite chauh an pe thei a ni. Hei vang hian Supply department chuan nimin khan thupek chhuahin, pump neitute’n petrol leh diesel litre 5,000 aia tlem an neih china an hralh chhuah theih tur zat a bithliah.

Supply department-in thupek a chhuah dan chuan, ni khatah two wheeler pakhat tan litre 5, LMV tan litre 10, maxicab/pick-up/407/Gypsy tan litre 20, truck tan litre 100, city bus tan litre 30 pek chhuah tur a ni a; buhfai phur truck tan bik an challan enin, an kalna leh haw lehna daih pek tur a ni. Pump-in litre 2,500 aia tlem an neih chinah chuan FCSCA department Director-in phalna/permit a pekte chauh pek tur a ni bawk.

Mizoram sorkar chuan nimin khan Aizawl khawpuiah sorkar bus eng emaw zat a tlantir leh. Lungleiah DC pawhin Lunglei khawpui chhunga sorkar bus tlan dan tur a ruahman thar a; veng hrang hrangah Lunglei College, DIET leh MST bus-te tlânna tur a siam a, nimin khan an tlan ṭan nghal a ni.

Commercial vehicle-te nawrh chungchangah hian Transport department chuan nimin khan hriattirna (notification) chhuahin, sumdawnna lirtheite chu service ṭan leh nghal turin a hriattir a; thupek zâwm lote chu dan anga action lak a nih tur a nih thu a tarlang.

Transport notification chuan, "Mipui hnathawk (public service) tura permit pek lirthei neitute'n permit pek an nih chhan ngai pawimawh loa an nawrh avangin ni thum lai mipui harsatna an siam a, hei hi sorkar chuan a ngaimawh hle a ni. Chuvangin, tun aṭang chuan mipui hnathawk tura sorkarin permit a pek lirthei neitute'n permit pek chhan angin service an ṭan leh vek tur a ni," a ti.