Rangkachak case CBI pek a ngai mai thei - Chief Minister

Chief minister Lal Thanhawla chuan, December 14, 2015 zana Aizawl daia rangkachak tawlhrûk suam leh rukbo thubuai chu Central Bureau of Investigation (CBI) kuta pek a la ngaih mai theih thu a sawi.

Nimina Congress Bhavan-a thu a sawinaah Lal Thanhawla chuan, rangkachak tawlhruk rûkbo thubuai chu Lawngtlai bank rawk ang mai mai a ni ve dawn lo tih a sawi a, "Rangkachak thubuai hi a lian hle a, an rûkbona hi a rei deuh tawh a, kar a awm tawh a, rangkachak ber hmuh chhuah a la ni lo," a ti a; police-te hnathawh chu chhuanawm a tih thu a sawi.

Chief Minister chuan, rangkachak chu thubuai chhuitu police-te leh Customs lamin an chhui zui mek zel tih a sawi a, "Kan police-te'n hma an sawn thei lo zel a nih chuan CBI kutah pek a la ṭul mai thei," a ti.

Congress kaihhruai sorkarah MNF sorkar angin police-te hna-thawhah zêp rûk a awm lo tih sawiin, Hawla chuan, "MNF hun laia hel ho tlangnêl ang kha a ni lo," a ti a; MNF sorkar hnuaiah Aizawlah hel ho an tlangnel thu leh tualthihna chhui chhuah loh a tam niin a sawi.

Lal Thanhawla chuan, Assam inthlana Congress party an chak lo leh BJP an tling chu a rin lâwk ang a nih thu sawiin, "Tarun Gogoi-a'n a fapa a duhsak uchuak nghawng a ni a, kan chak loh tur hi a chiang sa a ni," a ti a; an party mite chu mahni inhre chiang tur leh buaina pumpelh tura insiam rem thiam turin a chah a ni.