MFA General Body Meeting neih a ni

Mizoram Football Asso­ciation chuan nimin khan Rajiv Gandhi Stadium-ah General Body Meeting an nei a, minister PC Lal­thanliana'n a hmanpui.

MFA inkhawmpui hi senior vice president PC Vanlalhruaia'n a kaihruai a; MFA president Lal Thanzara chuan, Pathian khawngaihna zarah Mizo­ram football-in hma a sawn thu sawiin, "I-League-ah hial club kan nei ve ta hi a ropui thlâwt a ni. India club football inelna sang berah kan beisei ang thleng chiah lo mah ila Federation Cup final lutin sûlhnu ropui tak kan hnutchhiaha ni," a ti a; Aizawl FC president Robert Romawia Royte inpekna fakawm a tih thu a sawi.

Lal Thanzara chuan, AIFF leh FIFA-ten Mizoram an duhsak hle tih sawiin, "Sairang Dintharah FIFA hmalaknain artificial turf phah tura hmalak mek a ni a, sorkar nen indawrna kalpui zel a ni," a ti a; MFA hmalakna hrang hrang a sawi bawk.

Khuallian PC Lalthan­liana chuan, Mizoram football hmasawnna chu mipuiin mi tinin an hmu a, bengin an hria tih sawiin, "Khawvel hriata kan inpho­lan theihna remchang ber chu football hi a ni a, football hmang hian khawvelin min la hre dawn. Sorkarin infiamna a ngai pawimawh a, chief minister Lal Thanhawla kaihhruai sorkar leh MFA thawhhona ṭha takin malsawmna tam tak a keng a ni," a ti.

Inkhawmah hian MFA honorary secretary Lal­nghinglova Hmar-in kum 2015-16 chhunga MFA hmalakna hrang hrang leh Mizoram football hmasawn dan a sawi a; "Tun hnaiah Indian football kalphung thlak danglam a ni a, Mizo tan India club football inelna sang bera club neih a harsa tawh dawn. Keini'n kan tih theih chu Indian football-a Mizo player tam zawk eizawnna hmuhsak hi a ni a, footballer ber kan thawn thlak zel chuan Indian football-ah hian sûlhnu kan nei zel ang," a ti.

Lalnghinglova Hmar chuan, Tata Trust nen coach education lamah thawh­hona neih a nih tur thu te, U-Sports nena thawh dunna kaltangin Germany-a TSG Hoffenheim-ah Mizo naupang a tam thei ang ber football zirtir tuma hmalak mek a nih thu te, School Education department nena an thawhhona hnuaiah Mizorama centre 60 thlan bikah grassroot football kalpui tum a nih thute a sawi bawk.