Mizoram quota-a MBBS leh BDS zir tur SMATE hmangin thlang dawn

Sorkar laipui chuan MBBS leh BDS zir tur thlanna exam chungchangah nimin khan Ordinance a siam a; hei vang hian Mizoram sorkar chuan Mizoram quota-a MBBS leh BDS zir turte chu State Medical and Technical Entrance (SMATE) hmangin a thlang thei dawn a, SMATE exam hun pawh sawn a ni.

Higher & Technical Education department hotute hnen aṭanga thu dawn danin, SMATE exam hi May 24-25, 2016 chhungin buatsaih tum a ni a; mahse, MBBS leh BDS zir tur thlanna atan hman theih a nih dawn tak avangin a hun sawn hlat a ni a, exam hun tur erawh la inhriattir leh tur a ni.

HTE hotute chuan, SMATE exam hmachhawn duhte tan exam form lak chhuah leh thehluh theih hun an hawng leh tih an sawi. Hei hi kar leh Thawhṭanni aṭangin ngaihven theih a ni ang.

HTE hotute chuan, Mizoram quota-a MBBS leh BDS zir tumte tan NEET paltlang kher a ngai lo tih sawiin, "Mizo-ram quota-a zir turte chu SMATE kaltlangin thlan a ni ang," an ti a; Mizoram quota ni loa zir turte tan erawh chuan NEET paltlang a ngai tih an sawi bawk.