CM-in CVJAC thilphût hlawhtlintir a duh lo

Chief minister Lal Thanhawla chuan, Comercial Vehicle Joint Action Committee (CVJAC)-te'n lungawi lohna an lantir chu an mahni hmasialna vangah leh mipui tawrh tir pawi ti loah a puh a; an thil phût chu hlawhtlintir loh a duh thu a sawi.

Nimina Congress Bhavan-a political session-ah thu sawiin, Lal Thanhawla chuan, "CVJAC-te'n mipui tawrhtir pawi ti loa nawrh an huaihawt chu mahni hmasial vang a ni a, a zah theih loh thlak hle. Mipui tawrhtir pawisa loa chete thil tih hi hlawhtlintir loh ka duh a ni," a ti.

Lal Thanhawla chuan, sum-dawnna lirthei nawrh vangin Aizawlah mipuite'n harsatna an tawk ṭan tawh tih sawiin, harsatna sukiang turin sorkarin hma a lak thu a sawi a, "Mipui mamawh phur turin sorkar truck zawng zawng kan khawm ang a, a ṭulna apiangah kan tlantir ang," tiin, sorkar bus-te pawh khawm belh zel tum a nih thu a sawi.

Bus leh taxi neituten permit pek chhuah tawh loh an duh chu demin, Hawla chuan, "He sum-dawnna hi keimahni chauhin kan nei tur a ni tih rilru hi a ṭha lo," a ti. Sumdawng lirtheite an nuar zel dawn a nih chuan taxi-a eizawng duhte tan taxi permit thar pek chhuah mai rawt a duh thu sawiin, "Inti champ lutuk taxi-te hi kan nék chár ve thei,"a ti a; Aizawl khawpui daifema tlân turin auto-rickshaw permit pek chhuah leh two wheeler taxi siam rawt a tum thu leh, sorkar hotute'n an remtih chuan kar leh aṭangin permit pek chhuah mai theih a nih thu a sawi bawk.

MPCC President chuan, MNF sorkar laiin kum khatah taxi permit 3,000 chuangte an pe chhuak nia sawiin, "Taxi permit hi mipui hisapa pek tur a ni a, tunah hian Aizawlah mipui zat ngaihtuahin taxi 1,500 vel bak kan mamawh lo. Kan sorkar hnuah tun thlengin taxi permit kan la pe chhuak lo," a ti a; city bus permit pawh a
ṭulna vangin 15 vel chiah an la pe niin a sawi.

Chief Minister chuan, sorkar hmalaknate chu mipui hamṭhatna leh himna tur a ni tih sawiin, "Auto-rickshaw kawng-khar dinglam kalh tih hi Supreme Court ordert a ni," a ti. Hmun dang aia Mizoram kawng a chhiat avangin ram dang angin lirtheite a tlo thei lo tih sawiin, motor chhiah pek hun chu kum 10 tala tihniam a rawt tawh thu leh, ṭum khata pek tlak nghal lohin, instalment-a pek theih tura tih Central-ah a rawt tawh thu a sawi bawk.