KHAWTHLIR

College pawm

Mizoram University (MZU) Academic Council chuan Aizawl City College chu affiliation a pe thar. Aizawl City College hi kum 2015-16 academic session-a din thar a ni a, tlai lamah class an kal ṭhin a, zirlai ṭhahnem tak an nei mek a ni.

Consumer-te chanvo zirho

Mizoram Consumer Union (MCU) leh State Commission ṭangkawp chuan nimin khan IPR Conference Hall-ah Consumer Rights & Protection chungchang zirhona an buatsaih a, Assembly deputy speaker R Lalrinawma'n a hawng. Inkhawmah hi MCU president K Thanglura'n a kaihruai a, State Commission president BP Katakey chuan thupui a sawi. Workshop-ah hian Kolasib, Serchhip, Champhai leh Mamit
aṭangin MCU hruaitute an tel.

Disaster plan zirho

Disaster Management & Rehabilitation (DMR) department hmalaknain nimin khan IPR Auditorium-ah 'Preparation of Departmental Disaster Management Plan’ chungchang zirhona neih a ni a; DMR director C Lalpeksanga'n a hawng. Training-ah hian sorkar departement hrang hrang 60 koh khawm an ni a; ATI-a head faculty Dr Lalrokima Chenkual chu resource person a ni.

Motor chesualah thi

Nimin zing dar 6:30 vel khan Mamit district-a Damdiai khaw bulah pick-up a chesual a, motor neitu leh khalhtu CL Zarliana (59), Mamit Venghlun VCP chu a hmunah a thi. Mi dang pakhat chuang ve erawh chu a na lo thung. Motor hi Bairabi-a bazar tura kal a ni.

Zirlai chawimawi

MZP headquarters, Champhai chuan nimin khan Champhai Venglai community hall-ah Champhai district chhunga HSLC leh HSSLC exam-a ti ṭhate chawimawina hun an hmang a, parliamentary secretary (Finance) KS Thanga'n a hmanpui. Champhai MZP-te hian HSLC leh HSSLC-a ti
ṭhate bakah, Champhai khuaa MCS-a tling leh Ph.D hmute an chawimawi nghal bawk.