Land Revenue chhiah lakna ram ruakah AMC-in property tax la tawh lo turin rel

Land Revenue & Settlement (LRS) department-in ram ruaka chhiah a lâk dan leh Aizawl Municipal Corporation (AMC)-in ram ruaka Property Tax lak a tum chungchang chu nimin khan Revenue minister R Romawia leh UDPA minister Zodintluanga te hoin R Romawia pisaah sawiho a ni. LRS-in ram ruaka chhiah a lak tawhnaah AMC-in property tax la ve tawh lo se, an ti.

Meeting-ah hian, Land Revenue Act hnuaiah LRS department-in ram ruakah chhiah a lak mek lai a, Mizoram Municipalities Act, 2007 hnuaiah AMC-in ram ruakah tho Property Tax a lak theih dan te, India ram state hmun dangah pawh land revenue leh property tax-te chu lak kawp a nih ṭhin thute an sawiho a ni.

LRS department chuan, ram ruak dik tak chu sorkar ram, mimal kuta la hlan loh chauh a nih avangin, miin land lease/pass a neih tawh chuan ram ruaka ngaih ni loin, neitu awm a nih tawh avanga property a nih dan an sawi. AMC hotute chuan, property tax tling khawm chu Aizawl khawpui chei nan hman a nih tur thu an sawi. LRS department-in chhiah a lak zawng zawng chu sorkar sum báwm-ah chhûn luh a ni thung.

India ram state danga an lo tih thin angin Land Revenue Act leh Mizoram Municipalities Act hnuai-ah chhiah khawn chu a theih ve ve tho mah se, mipui tan phurrit a nih theih avangin sorkar department leh AMC hotute chuan mipuite tana harsatna siam ṭha loin an hria a ni.

Hei vang hian ram ruak, LRD department-in chhiah a lak tawhnaah chuan AMC-in property tax la ve rih lo mai se, an ti a; UDPA chu sorkar order chhuah turin an ti a ni.

Meeting-ah hian UDPA leh LRS department hotu te, AMC hotute leh Law & Judicial leh Finance official-te an tel.