Congress kan nghak ṭawih mek: Zorama

MNF president Zoramthanga chuan, Congress party chu a dintu hnam dangte pawhin an hnâwl tawh nia sawiin, "India ram hian Congress party tlu tawh hi kan nghak ṭawih mek a ni," a ti.

Nimina Mizo Hnam Rûna inkhawm-ah Zoramthanga chuan thu sawiin, Congress party chu state hrang hrang inthlanah an tla zel tawh niin a sawi a; state lian pali leh UT pakhat inthlan result tharah an tla a, UT pakhatah a chak ṭâwk nia sawiin, "Tuna an sorkarna state tlem la awmah pawh hian inthlan hun hun an tlak hun tur a ni," a ti. Hmarchhak biala Congress kulhpui Assam-ah pawh zah-thlak khawpin Congress an tla tih a sawi.

MNF President chuan, Mizoram hmar lam khaw 31-a village council inthlan result chu lawmawm a tih thu sawiin, "NLUP nen, sum leh pai nen, vauna chi tinreng nen minister rual an campaign chhung pawha khaw pariatah hneh taka MNF-in V/C kan la hi a lawmawm hle," a ti.