Thinghluna thlám hâl buaina: Kanhmun PS-ah FIR thehluh a ni Ministry of Home Affairs-ah sorkarin lungawi lohna thlen dawn MZP-in thlám an sa ṭha leh dawn
October 9, 2020-a Assam Police leh Forest mi leh sate'n Mamit district-a Thinghlun rama John Zolawma thlám an hâl leh huan thlai an tihchhiat chungchangah Mizoram sorkarin Kanhmun Police Station-ah FIR a thehlut a, sorkar laipuiah ziakin lungawi lohna thlen a tum. Thlám hâl chhiat a nih avangin MZP chuan tun kar chhungin thlám sak ṭhat an tum.
Assam mite'n thlám leh thlai an tihchhiatsak neitute chuanVanglaini palai zawhna chhángin, Inrinni khan Mamit DC-in anmahni a biak thu an sawi a, "Assam mi leh sate'n an thil tihchhiat hû chhût chhuak turin min hrilh," an ti a; FIR pawh sorkar lamin an buaipui tur thu DC chuan a hrilh tih an sawi.
Thinghlun aṭanga thu dawn danin, Mizoram sorkarin October 10, Inrinni khan 4th IR police platoon khat Thinghlunah a tir nghal a; thlám awmna hmunah IR police 10 vel riakin, a bak chu Thinghlun khaw chhungah an awm.
Mizoram sorkar chuan thuchhuah siamin, Thinghlun khuaa thlám hâl chungchanga sorkar hmalakna hrang hrangte a tarlang. Karimganj district official-te chêt dan chu dan piah lam a nih avangin Assam sorkarah leh Ministry of Home Affairs-ah ziakin lungawi lohna sorkarin a thlen dawn.
Sorkar thuchhuah tarlan danin, Karimganj-a Assam sorkar official-te mawi lo tak leh dan pêla an chêt avangin Kanhmun PS-ah FIR thehluh a ni a, thubuai ziah luh niin, chak taka bawhzui nghal tur a ni.
Assam mi leh sate'n Mizorama thlám an hâl ṭum hian an state-a tual chhunga thuthar thehdarhtute an hruai a; media lam chuan Police leh Forest department mite hmalakna leh chêt dan chu video-in thla an lo la a ni.
Thil thleng chungchangah hian MZP Gen.Hqrs chu Inrinni khan an ṭhukhawm a, John Zolawma thlám tur sak ṭhat leh an rél. An hmalakna tura thawhlawm thawh duh tan SBI account no. 10763514287 IFSC code - SBIN0001539 ah pawisa thawh theih a nih thu an tarlang.
An thurel bawhzuiin Inrinni vêk khan MZP hruaitute chuan an president B Vanlaltána hoin Thinghlun an pan a, thlám sak dan tur an enfiah. B Vanlaltana chuan Vanglaini palai zawhna chhangin, tunkar chhung ngeiin thlám sak hman an tum thu a sawi a, "Châkkhaite kan la khawm ang a, a bul ṭan tur intírin, chumi hnuah a náwlpuiin kan hnatlang ang," a ti.
Hetih lai hian YMA, Langkaih Group chuan ramriah IR police dah a nih dawn avangin an awmna tur in sa turin Langkaih group huam chhunga YMA branch hrang hrangte hnatlang a ko a; YMA branch pakhat aṭangin mi 20 aia tam lo thawk chhuak tura inhriattirin, hna thawhna hmanraw hrang hrang keng turin an inchah.
Sorkarin a hmalakna a tarlante
• Inrinni khan Mamit DC Dr Lalrozama, SP Shashank Jaiswal leh 4th IR police commandant Lallianmawia ten thlâm hàl leh thlai tihchhiatte a hmunah an enfiah.
• Karimganj-a Assam sorkar official-te dan pèla an chêt avangin Kanhmun PS-ah case register a ni a, chak taka bawhzui nghal tur a ni.
• Mizoram-Assam ramri, Thinghlun khaw dáia Assam official-te'n October 9, 2020-a 'Govt. of Assam, Office of the Sub-Beat Forest Office, Ronpur (under Cheragi Range) Karimganj Division' tih signboard an tàr chu Inrinni khan Mamit district official-te’n an la thla.
• John Zolawma thlám awmna hmunah 4th IR police-te'n puan-in pahnih kaihin an awm chilh nghal. Vawiin hian John Zolawma huanah 4th IR police platoon khat ramri venga an awm theihna turin Thinghlun khawtlangin bahrik (barrack) ṭha zawk an sa dawn.
• Inrinni khan Chief Secretary hoin DGP, Home Secretary, IGP (Law & Ooder), IGP (HQ), Revenue Secretary, DIG (Northern Range), Law & Judicial Joint Secretary leh sorkar official dangte an ṭhukhawm. Chumi hnuah Chief Secretary hoin Central YMA leh MSU hruaitute an ṭhukhawm leh bawk.
• Mizoram DGP-in Inrinni khan Assam DGP a bia a, Mizo mipui leh sorkar duh dante a hrilh.
• Assam sorkar chêt dan hi Mizoram sorkarin a dem a, dan piah lama an chêt avangin Assam sorkarah leh Ministry of Home Affairs-ah ziakin lungawi lohna a thlen dawn.