Covid-19: Mizoram dinhmun Chhuahtir tawh zat - 92.24%

Mizoramah Covid-19 vei October 9, Zirtawpni khan mi panga, October 10, Inrinni khan mi 13 leh nimin khan mi pali hmuh chhuah a ni a; Covid-19 symptom nei an awm nual. Inrinni leh nimin khan mi 36 chhuahtir an ni a, a pumpuia chhuak tawh zat chu 92.24% a ni.

October 9, 2020-a hmuh chhuahte chu mipa pali leh hmeichhia pakhat an ni a, ZMC-a hmuh chhuah pahnih, TrueNAT-PCR hmanga Lawngtlai District Hospital-a hmuh chhuah mi pakhat leh, Rapid Antigen Test (RAT) hmanga Kolasib district-a hmuh chhuah mi pahnih an ni. An zingah Mizoram chhunga kai mi pahnih an tel.

October 10-a hmuh chhuahte chu mipa pakua leh hmeichhia pali an ni a; ZMC-a hmuh mi pahnih, TrueNAT-PCR hmanga Serchhip leh Lawngtlaia hmuh pakhat ve ve, RAT hmanga Aizawla hmuh mi pasarih leh Kolasib-a hmuh mi pahnih an ni. Aizawla hmuh zinga mi paruk chu chhungkaw pakhata mi an ni a,  Mi­zoram chhunga kái an nia hriat a ni.

Nimin khan RAT hmangin Dawrpui venga nufa (hmeichhe puitling ve ve)-in hripui an vei tih hmuh chhuah a ni a; Tuikual North-ah nupa kum 58 leh 52 mite hmuh chhuah a ni bawk. Dawrpui leh Tuikual North LTF hruaitute hnen aṭanga thu dawn danin, mi palite hi Mizoram chhunga kái chhâwng vek an ni.

Covid-19 positive enkawl zinga negative tawh mi 10, hnam dang mipa vek chu Inrinni khan Lunglei Zobawk CCC aṭangin chhuahtir an ni a; nimin khan CCC pali - Serchhip Nursing School aṭangin mi 13, Champhai aṭangin pakhat, CIJWS, Vairengte leh Mamit aṭangin paruk ve ve an chhuak a, an vaiin mi 26 an ni.

Mizorama Covid-19 positive hmuh chhuah tawh chu mi 2,179 an ni a, mipa 1,797 leh hmeichhia 382 an ni. An zinga mi 2,010 (92.24%) chu an fihlim tawh avangin an chhuak tawh a, enkawl mek mi 169 (7.76%) an la awm.

October 9, 2020 khan ZMC laboratory-a swab sample 162, district pariatah TrueNAT hmangin sample 105 leh district pariatah vek RAT hmangin sample 987 endik a ni a, a vaiin sample 1,254 a ni. October 10-a swab sample endik dan chu - ZMC-ah 173, TrueNAT hmangin district parukah 113 leh RAT hmangin district pariatah 172 a ni a; a vaiin sample 358 a ni.

October 9, Zirtawpnia ZMC laboratory-a hripui vei hmuh chhuah chu Dawrpui venga nupa an ni a, pa zawk kum 68 leh nu zawk kum 69 an ni. Hmeichhia zawkin Covid-19 symptom a neih vanga endik an ni a, an kaina chhan àwm hriat a ni lo.

Sorkar thuchhuah tarlan danin, TrueNAT-PCR hmanga Lawngtlaia hripui vei hmuh chhuah chu BRO driver kum 40 mi a ni a, tun hnaia Assam aṭanga rawn lut, khung hran lai a ni. RAT hmanga Kolasib district-a hmuhte chu mipa kum 30 leh 37 an ni a, Bairabi FCI kudama thawk tura Assam aṭanga rawn lut an ni.

October 10, Inrinniah ZMC RT-PCR laboratory-ah Covid-19 positive mi pahnih hmuh thar a ni a, 90 Bn. BSF sipai ve ve, kum 27 leh 33 an ni a, quarantine facility-a awm lai niin, taksaah harsatna an nei lo.

TrueNAT-PCR hmangin Serchhip District Hospital-ah West Bengal mi mipa kum 27-a upa hmuh chhuah a ni a, Prem Kram infracon hnuaia hna thawk a ni. Lawngtlai District Hospital-ah pawh mipa pakhat, kum 26 mi hmuh a ni a, Delhi-a thil zira awm, October 2-a rawn haw, quarantine facility-a awm mek a nih thu sorkar thuchhuahin a tarlang.

RAT hmangin Aizawl district-ah mi pasarih, mipa pathum leh hmeichhia pali hmuh chhuah a ni a, a naupang ber chu nautê thla riat mi a nih laiin, a upa ber chu kum 59 a ni. An zinga paruk (mipa leh Hmeichhia pathum ve ve) chu Tuikual North-a chhungkaw pakhata mi an ni. Mi dang pakhat chu hmeichhia, Mizoram páwn aṭanga rawn lut, Lengpui Airport-a endiknaa hmuh chhuah a ni thung.

Kolasib district-ah mipa pahnih hmuh chhuah a ni a, Vairengtea khawsa kum 30 leh 42 niin, Covid-19 symptom an neih vanga endik an ni.