GAC ram chuhpuitua an puhte'n An ram ngei a nih thu an sawi

Govt. Aizawl College (GAC) Students' Union hruaitute'n Mualpui, Aizawla GAC ram chuhpuitua an sawi Lalsangbera Hnamte chuan, he ram chungchangah hian Gauhati High Court, Aizawl Bench-in kum 2009 khan thutlukna a siam tawh thu a sawi a, "GAC hotute'n lei min dil lai mek a ni," a ti.

Lalsangbera Hnamte hian Inrinni khan thuthar thehdarhtute a kâwm a; GAC SU-te'n ram an chuhpui anga an sawiah hian kum 2000 khan sorkarin E Thangkhuma hnena LSC panga a pek thu sawiin, "Sorkar nena buaina deuh an neih avangin Pu E Thangkhuma hi High Court-ah a zualko a, court chuan De­cember 8, 2009-ah thutlukna a siam," a ti.

Lalsangbera sawi danin, Court chuan Mizoram sorkar chu thla ruk chhungin E Thangkhuma hnenah a lungawina tâwk zangnadawmna pe turin a hriattir a, zangnadawmna a pek loh chuan LSC chu sorkara pêk lêt (surrender) ngai lo turin thutlukna a siam. Mizoram sorkarin zangnadawmna a pe lo a, chuvang chuan E Thangkhuma ram a ni chhunzawm ta a; E Thangkhuma hnen aṭangin dan angin ram chu an lei chhâwng a ni.

Kum 2012 khan sorkar chuan an ramah hian Higher & Technical Education Secretary hmingin land lease a pe a, GAC awmna tura tih a nih thu sawiin Lalsangber chuan, "Gauhati High Court-ah kan zualko ve leh a, March 12, 2018 khan interim order tichhuah niin, sorkar leh GAC chu he lai hmunah hian kutthlak rih lo turin a ti a, tunah hian final judgement kan nghak mek," a ti.

Lalsangbera Hnamte chuan, an ram chu GAC zirtirtute'n sorkar leitir an tum a, ṭum eng emaw zat an indawr thu sawiin, "Titláwm deuh turin min ngen a, an duh ang chuan kan remtihsak a ni. Hetiang boruak an neih mek laia thil thleng hi kan hrethiam lo hle," a ti a; tuna GAC-in building an sak tawhna chin pawhin an ram chhung eng emaw zat a huam thu a sawi.

Hetih mek lai hian Lalsangbera ten an ram chin humhalhna atana an hungna chu tun hnai khan tihchhiat a ni a, hei vang hian FIR thehluh an tum.

Tarlan tawh angin, GAC SU-te chuan October 9, 2020 kha thuthar thehdarhtute kâwmin, sorkarin an college tana ram a pek chu chuhpuitu an awm avangin hna thawh theih a ni lo a, kum 2020-21 academic session aṭanga luah ṭan an tum chu a theih loh phah tih an sawi a ni.