MNF sorkarah Mizoram a him lo - ZPM MLA

ZPM MLA pathum - Vanlalhlana, Lalchhuanthanga leh Andrew H Thangliana te chuan October 10, Inrinni khan Thinghlun khaw rama Assam police-te'n October 9, 2020-a John Zolawma thlám an hâlna hmun an tlawh a; MNF kaihhruai sorkar hnuaiah Mizoram a him loa an hriat thu an sawi.

Vanlalhlana chuan, Covid-19 laka invênna atana Thinghlun Village Task Force-te'n John Zolawma thlám bula vènbûk an siam chu Assam lamin an ngaimawh avangin Mamit district-a sorkar thuneitute'n an lo hâl tawh tih a sawi a, "Hei vang hian Assam lam hian ngampa takin thlám hi an rawn hâl ta a ni tih a chiang hle," a ti.

John Zolawma thlám leh Thinghlun khaw inkara Mamit district MGNREGA lungphun pawh Assam police-te'n an tichhuak tih sawiin Vanlalhlana chuan, "Mizoram sorkar hian Assam sorkar thu an hnial ngam lo hle a, MNF sorkarah Mizoram a him lo hle a ni," a ti. ZPM MLA pathumte hian John Zolawma tawrhpuina atan Rs. 2,000 ṭheuh an hlân.

ZPM thuchhuah tarlan danin, Assam police-te'n John Zolawma thlám an hâl bakah, a huan thlai an suasam nasa hle a; an zahthlâk zingah chhawhchhi quintal 2 thar ngei tura ngaihte leh kuhva kung 600 a tel. ZPM MLA-te hi Luimawi khuaah Mamit DC Dr Lalrozama nen an inhmu a, Mamit DC chuan thil awmzia a hrilhfiah a ni.