Police 1,047 vote thlâk loh chhanah MNF Senior VP-in ZPM sorkar a puh

MNF senior vice president Dr R Lalthangliana chuan, Mizoram police company 15-a mi 1,047-in Lok Sabha inthlana vote an thlâk loh chhanah sorkar a puh a, ngaihdam dil turin ZPM sorkar a phût.

Dr R Lalthangliana hian May 25, Inrinni khan Aizawl Press Club-ah thuthar thehdarhtute kâwmin, "Lok Sabha MP thlanna April 19-a neih tâkah Mizoram armed police 1,047 vote thlak thei loa siam an ni hi pawi kan ti tak zet a, Mizoram sorkar inthlahdah vang liau liau a ni tih a chian avangin kan police chhuanawm tak takte lakah hian ZPM sorkar hian ngaihdam a dil ngei turah kan ngai," a ti.

MNF Senior Vice President chuan, "Vote thlâk thei lo tura ruahmanna a siam kher kher hi kan police-te dikna chanvo rahbehsakna langsar tak, Mizoram election history-ah thil la thleng ngai lo a ni a, thleng nawn tawh lo se kan duh em em," a ti a; Mizoram sorkar chu ruahmanna siam lâwk duh loah a puh.

MNF tarlan danin, MHA-in a ngen dan chuan, Bihar leh Uttar Pradesh-a duty turte chu April 1, 2024-ah duty-na turah inhriattir (induction) tur a ni a; UP-a duty turte March 28 leh Bihar-a duty turte March 29-a kal tur rél ticket laksak an ni. Madhya Pradesh-a duty turte chu April 8-ah an duty-na turah inhriattir tur a ni a, April 3-a kal turin rél ticket lâk a ni. Mizoram bika MP thlanna tura hming pe lut (candidate)-te inhnuhdawh theih hun hnuhnung chu March 30, 2024 a ni thung.

Bihar, Uttar Pradesh leh Madhya Pradesh-a Mizoram police mi 1,047-te chu duty tura tirh chhuah an nih hmain postal ballot hmanga vote thlak theih dan tur ruahmanna siam theih a nia an ngaih thu sawiin R Lalthangliana chuan, "Ministry of Home Affairs aṭanga ngenna Mizoram sorkarin a dawn bawhzuiin sorkar thuneitute'n vote an thlak dan tur ngaihtuah felsak hmasa loin state pathuma election duty turin an páwng­paw tirh liam tawp mai a ni," a ti.

Dr R Lalthangliana chuan, "Rua­hmanna siam ngam lo, siam nacháng hre lo sorkar kan hrawn avanga kan police 1,047-in vote an thlâk theih loh phah ta hi an dikna chanvo palzutsakna, engti zawng maha sawi fel ngaihna awm lo, thil dik lo leh Mizoram sorkar tana zahthlak tàwpkhâwk a ni," a ti a; vote an thlak theih nan police hotute'n ṭan an lâk laiin, ZPM sorkarin an nawrpui lo niin a sawi.

MNF Senior Vice President tarlan danin, police mi 1,047-te'n vote an thlâk theih nan April 17, 2024-ah Mizoram IGP-in Mizoram Chief Electoral Officer hnenah lehkha a thawn a, CEO-in Election Commission of India-ah a thawn chhâwng. ECI chuan May 1-ah police mi 1,047 tan vote thlak theihna tur kawng hawn theih a nih tawh loh thu a rawn hriattir a ni.

ECI-in May 1-ah chhanna a rawn thawn tawh lai leh party ṭhenkhatin hma an lak laia police-in vote an thlak theihna tura MNF-in hma an lâk loh chhan leh, May 25-a press conference an neih chauh chhan press mite zawhna chhangin MNF Publicity Board vice chairman J Malsawmzuala Vanchhawng chuan, "Vote an thlak ve lo tih hi kan hre hnuhnawh a ni. Thil tihfel vek hnua kalah kan ngai a, vote an thlâk thei dawn lo tih kan hriatin kan bawhzui ve ta a ni," a ti.

J Malsawmzuala chuan, "MHA order rawn siam ang anga deploy (kaltir) tawp loin, thawh thumna leh linaa duty tur an ni a, kal tlai deuh tura nawr theih a ni," a ti a; sorkarin ngaihtuahna séng lêm loin a kaltir tawp nia a lan thu a sawi.