Ruihhlo tite chhan chhuah tumin sorkarin hma a la mek zel - CM
Chief minister Lalduhoma chuan, ruihhloin Mizoram a chiah nasat thu sawiin, ruihhlo tite chhan chhuah tumin sorkarin hma a lak mek thu a sawi.
Thutak Nunpuitu Team (TNT), Muanna Veng chuan an hotupa Sangthankima'n tun hnaia civil mite chawimawina sang Padma Shri a dawn chu an hmunah an lawm a, CM Lalduhoma leh Home minister K Sapdanga ten an hmanpui.
Chief Minister chuan, "Ruihhloin Mizoram a chiah nasatzia kan hre vek a, a enkawlna hmun pawh kan nei nual.... Ṭhalai ruihhlo ngaite hi kan vei em em a, chhan chhuah tumin hma kan la chho mek zel a ni," a ti.
Lalduhoma chuan, ruihhlo ngaite enkawlna kawngah rinnaa innghat inenkawlnate'n an thawh hlâwk hle a, an ṭangkai hle tih a sawi a; "Sorkarna kan siam khan mahni in pawh tlawh hmasa loin TBCC ka tlawh hmasa. Tun hnai lawkah hun rei tak mumala lo ṭhukhawm tawh lo Ruihhlo Do Core Committee kan ṭhu. Central YMA pawhin ṭhahnem an ngai hle a, kan lawm hle," a ti a; Pathian koha rawngbawltute thu awih chu malsawmna a nih thu a sawi. CM hian Padma Shri lawmna pualin buhfai ip 10 a pe a ni.
Home minister K Sapdanga chuan, harsatna tâwk mi sing tél enkawl tawhtu Sangthankima hnathawh chu ropui a tih thu a sawi a, "A lawmman dawn pawh hi a phú, ani tluka phú an awm bik chuangin ka hre lo," a ti.
TNT hotu Sangthankima pawhin thu sawiin, chawimawina a dawn lawmna tura sum leh pai thawhtute chungah a lawm thu a sawi a; Pathianin a kaihhruai dan a ropui thu te, CM Lalduhoma'n tun hmain ram dang aṭanga ṭanpuina an hmuh theih nan a lo ṭanpui tawh thu te, K Sapdanga pawhin a ṭanpui tawh ṭhin thute a sawi bawk.
TNT secretary R Malsawmtluanga sawi danin, TNT hi Sangthankima'n November 4, 1984-ah Champhai dáia a kalpui ṭan hnuah Aizawlah insawnin, Durtlangah bul an ṭan a, a hnuah tuna an awmna hmun chu K Thangzuala'n a hmantir a ni.
TNT hian ṭhalai mi 43,355, Pangpar Huanah mi 2,414 leh fahrah 939 an enkawl tawh a; Aizawl bikah mi 840, Pangpar Huanah mi 550 leh fahrah 340 enkawl mekin, chu'ng zingah chuan hnam dang eng emaw zat an tel. TNT dang - Lungleiah mi 720, Kolasib-ah mi 367, Champhaiah mi 320 leh Tahan, Myanmar-ah mi 250 an enkawl mek. TNT aṭanga enkawl chhuah tawh TNT team worker 94 an awm mek a, TNT aṭanga pawl 10 zo mi 184 an awm tawh bawk.
Sangthankima'n Padma Shri a dawn lawmna inkhawmah hian TNT Zaipawl Ropui, TNT naupang zaipawl leh TNT Band-te'n hla an rem a, tlaiah ruai an ṭheh a ni.