Monitoring Committee-in kawng an endik
Mizoram sorkarin hmasawnna hnathawhte endik tura a din, Mizoram State Project Monitoring Committee (MSPMC) member-te chuan May 24, 2024 khan Sumsuih leh Tuirial lui inkara kawng (link road RCC pavement) siam mek leh NH-54 Aizawl-Tuipang siam meka Serchhip leh Keiṭum chhehvela leivûng paihin ram a nghawng dan an endik.
MSPMC secretary Vanlalruata Sailo chuan, Mizorama hmasawnna hnathawhte dik taka thawh a nih a, a puitlin huna mipuite'n an chhawr ṭangkai ngei theih nan MSPMC-in endik leh ven chungchangah sorkar a pui zel dawn tih a sawi a; thawhpui atan Mizo mipui a sáwm.
MSPMC hian Ministry of Tribal Affairs aṭanga sum hmuh nuai 426.801 hmanga km. 12-a thui Sumsuih-Turial lui inkar kawng (RCC pavement) siam mek an endik a; kawng siam chu ruahman ang taka a puitlin a, ṭangkai taka hman a nih theih nan an thil hmuh dante sorkar thuneitute hnenah an thlen dawn a ni.
NHIDCL hnuaia National Highway 54, Aizawl-Tuipang kawng siam mek aṭanga leivûng paihin Serchhip leh Keiṭum chhehvel ram a nghawng dan leh leivûng paihna (spoil bank) an siamte a ṭha leh ṭhat loh an endik bawk a; leivûngin huan leh ram a tihchhiat siamṭhat hna thawh dante an enfiah bakah, hmabaka thawh zui zel dan turte an sawipui bawk.
Kawng endiknaah hian kawng laih hna thawktu Kram Infracon hotu te, New Serchhip North, New Serchhip South leh Keiṭum VC president-te, MSPMC aṭangin Secretary bakah member dang - George Lalzuia, Lalremsangi Fanai leh Vanchhungi te an tel a ni.