Mizorama hripui kái chhâwng Hmuh chhuah belh zel a ni

Covid-19 vei hmuh chhuah thar zingah Mizorama kái chhâwng an awm tawh mang loh laiin, tun hnai ni thum chhungin state chhunga kái chhâwng mi 12 vel an awm a, a tam zawk chu taksaa harsatna nei (Covid-19 symptom lang) an ni.

October 10, Inrinnia Covid-19 vei hmuh chhuah zinga paruk - mipa leh hmeichhia pathum ve ve chu Tuikual North Section-I huam chhunga chhungkaw pakhata mite an ni a, an zingah nautê thla 8 mi a tel.

Tuikual North Local Task Force secretary T Lalrinpuia hnen aṭanga thu dawn danin, an veng mi Covid-19 positive hmuh tharte chu symptom nei an nih avangin nimin khan State Referral Hospital-ah hruai nghal an ni a; mi parukte hian an kài chhan àwm an hre lo.

Tuikual North LTF chuan an veng mi hripui vei hmuh tharte'n an kai chhawn theih àwma ngaihte an chhui zui nghal a, positive first contact mi 50 vel an awm. First contact-te zinga eng emaw zat chu nimin khan RAT hmangin an sample endik a ni a; mi pahnih, nupain hripui an vei tih hmuh chhuah a ni.

Tuikual North LTF chuan, an venga dawr pakhat, MINI SHOP 18-a October 1-10 chhunga kalte chu an veng LTF hruaitute hnena inhriattir turin an chah bawk.

October 9, Zirtawpnia Covid-19 vei hmuh chhuah zingah Mizorama kái pahnih an tel bawk a; anni hi Dawrpui venga nupa kum 68 leh 69 an ni a, pakhat zawkin Covid-19 symptom a neih vanga an swab sample endiktir an ni. Anni pawh hian an kàina chhan àwm a hre lo.

Dawrpui vengah hian nimin khan RAT hmangin Covid-19 positive pahnih, hmeichia ve ve (nufa) hmuh chhuah leh a ni bawk.