Siaha MJA-te leh AR hotute inkâwm

Siaha district-a awm Assam Rifles hotute leh Siaha district Mizoram Journalist Association member-te chu May 25, Inrinni khan Siahaah an inkâwm a, thil chi hrang hrang an sawiho.

20th Bn. Assam Rifles company commander Maj. Raj Kishor chuan, sipaia luh tum ṭhalaite hnenah a thlâwna inzirna an ruahman ṭhin thu leh Siaha district-a ṭhalaite tan an inhawn reng thu a sawi a, "Ṭhalaite hi ram leh hnam innghahna ber an nih angin zu leh ruihhlo laka an fihlim a pawimawh. Siaha district hi international border-a awm a nih angin dan loa thil lak luh donaah theihtawp kan chhuah ṭhin," a ti.

Maj. Raj Kishor chuan, ramri ven chauh an hna a ni lo a, ruih theih thil vêng­in hna an thawh nasat thu a sawi a; Siaha MJA hnathawhte fakawm a tih thu sawi­in, MJA-te nen thawhhona ṭha tak awm turin an inhawn reng thu a sawi bawk.

MJA member-te pawhin Siaha district a rálmuan zelna tur leh hmasawnna ṭha zawk a awm theih nan Assam Rifles-te nen thawhho zel an duh thu an sawi.