Rakhine state-a thawn lo turin ngen

Central Young Lai Association (CYLA) chuan thuchhuah siamin, Rakhine state, Myanmar-ah bungrua thawn tawh rih lo turin mipui an ngen.

CYLA chuan, tun hnaiah Lawngtlai district leh hmun hrang hrang aṭangin Rakhine state-ah bungrua phurh luh ṭhin a nih thu a tarlang a, "Tun hnai maiah Rakhine state-ah Burma sipaiin bomb an thlâk leh ṭhin avangin heng lai hmun hi a him lo tih hriat a ni. Lawngtlai district kaltlanga Myanmar ram chhunga bungraw phur chi lirthei kal reng hi thil ṭha lo zawk thleng thei a nih avangin May 25, 2024 zan dar 12 thleng chauh bungraw phur lirthei kal hun hawn ni se," an ti.

May 25, Inrinni zan dar 12 hnu lamah chuan Myanmar lama kal tur lirthei reng reng Lawngtlai district kaltlanga luh/kal an remtih tawh loh thu tarlangin CYLA chuan, "Buaina leh harsatna nasa zawk thleng thei laka himna tur a ni tih hriaa zâwm turin mipui kan ngen a ni," an ti a; an ngenna zâwm lote'n harsatna engpawh tawk se an duh thlanna a nih tur thu an tarlang.

Vanglaini thu dawn danin, Myanmar ram buaina avangin Rakhine state-ah ei tur leh tuialhthei mamawhna a sang a, March 2024 thla laihâwl vel aṭang khan tuialhthei leh ei tur lam chi eng emaw zat thawn luh a ni tawh. Bungrua phurh tur a awm tam lai chuan tualchhungah mamawh thila hman tur lirthei awm mumal loh cháng a awm ṭhin.