CEO-in Hnahthial a tlawh

Chief electoral officer Madhup Vyas chuan May 25, Inrinni khan Hnah­thial a tlawh a, Lok Sabha inthlanpuia vote tlate chhiarna hmun tur leh electronic voting machine (EVM) dahna strong room a enfiah a, DC meeting hall-ah sorkar hotute a kâwm bawk.

Inkawmhona hi Hnahthial district election officer Chuauhnuna, bawrhsapin a kaihruai a; Madhup Vyas chuan, Mizoramah MLA leh MP inthlan a hmachhawn tawh thu sawiin, inthlan­na felfai leh thianghlim tak a awm ṭhin chu lawm­awm a tih thu leh Hnahthial district-a vote chhiar tura an inbuat­saihnate a ṭha thawkhata a hriat thu a sawi a, "Vote chhiar hi Election Commission of India duh dan ang ngeiin kalpui ang che u," a ti.