KHAWTHLIR

Vawk thi paih vangin FIR a lut

Lunglei District Pig Farmers Association (LDPFA) chuan, Rahsi Veng thlanmual thlang kawng kama vawk thi paihtu chhui chhuah a nih theih nan March 25, Inrinni tlai khan Lunglei Police Station-ah FIR an thehlut. LDPFA hian FIR an thehluhah, vawk hri lên lai a nih avang leh vawk hri tidarh theih a nih avangin vantlang tan thil pawi thei a nih thu an tarlang a, vawk paihtu zawng chhuak a, a ṭul anga hma la turin police-te an ngen a ni.

Tuikhuahah tla hlum

May 24, Zirtawpni tlai dar 3 vel khan Lalvenhima (7) s/o Vanlalvula, Champhai Zotlang chu tuikhuahah a tla hlum. Thu dawn danin, Lalvenhima hi a ṭhiante nen sikul an bàn hnuah hume pipe siam sa chiah daihna atana tuikhuah siamah an cheng a, a tla hlum a ni. A ruang hi a pu awmna Kawrthahah laka vui a ni.

AR-in heroin man

Assam Rifles chuan May 24, 2024 khan Zokhawtharah heroin gram 46 an man a, a neitu Myanmar lam mi, mi pakhat nen Zokhawthar police-te hnenah an hlan. Heroin an man hi Rs 32,20,000 hu a ni.

Ruihhlo that lohzia inzirtir

YMA, Khatla South Branch chuan an YMA chhangte leh an venga tleirawlte pualin May 25, Inrinni khan ruihhlo, HIV/AIDS leh mipat hmeichhiatna hman sualna laka fimkhur dan tur inzirtirna an buatsaih. An venga naupang leh tleirawl 150 vel telin, ruihhlo ti lo turin an intiam a; Foundation for Drug-Free Mizoram mite'n thil pawimawhte an zirtir a ni.

Committee-in endik

Mizoram Legislative Assembly hnuaia Committee on Estimates chuan May 24, 2024 khan an chairman W Chhuanawma hoin Thingsulthliah RD Block hnuaia Thingsulthliah leh Sesawng khuaa Sihpui zau leh Kaihlet zaua WDC-PMKSY 2.0 kaltlanga RD department-in project a thawh tawhte an enfiah. Hamṭhatna dawngtute an káwm nghal a, scheme hnuaia hamṭhatna an dawn leh harsatna an tawhte an sawipui.