Taitesena Group YMA-in Ramri vèn rammut an titàwp
YMA, Taitesena Group chuan Covid-19 laka invênna atana state ramri vèn hna April 13, 2020 (Thawhṭanni) aṭanga an thawh chu vawiin aṭangin an titawp dawn a, ramria duty-te an inko haw tawh dawn.
Taitesena Group YMA hian Mizoramah coronavirus a luh loh nan kumin April 13 aṭangin an group huam chhunga state boundary-ah hripui dái theuin an rammu ṭan a, chatlak awm loin nimin thleng khan riahchilhin ramri an veng a ni.
Nimina online hmanga Taitesena Group YMA Executive Committee meeting chuan, Mizorama Covid-19 lênna chu ram lailî lam a nih avang leh sorkar ruahmannate a danglam tâk zel avangin, October 12, Thawhṭanni aṭang chuan Taitesena Group YMA hminga rammut kalpui mek chu tihtawp tawh an rél a ni.
Taitesena Group YMA chuan, ni 182 an rammut chhungin ṭo thli leh fûrpui an paltlang tih sawiin, "Natna leh inhliamna laka min vengtu Pathian chungah lawmthu kan sawi a, thâ leh tui, sum leh pái sêngtu te, thilpek min petu zawng zawngte chungah lawmthu kan sawi a ni," an ti. Ram leh hnam chhan tura ke pên a ngaihna apianga che turin an inkau reng thu an tarlang bawk.
Taitesena Group YMA hian Kawrtethawveng, Tuidam, Kawrthah, Rengdil, Zamuang, Hriphaw, Chuhvel, Saikhawthlir leh Bunghmunahte an duty ṭhin a, ramriah riahbuk 45 an sa a ni. Tun hnaiah chuan khawchinin a zir loh avangin khawbul hnaiah ramri vengin an riak ṭhin.