MLA-te dan bawhchhiaah puhin PC-AAP-in Speaker-ah thu thlen; Dan bawhchhiatna a awm lo - Speaker

Peoples Conference party leh Aam Aadmi Party hruaitute chuan, Assembly dan kalhin MLA 16-te'n nihna an nei nia an hriat avangin chinfel emaw, dan siamṭhat emaw a nih theih nan nimin khan Assembly Speaker leh ZPM Val Upa Council hnenah ziakin thu an thlen. Speaker chuan, PC leh AAP-te'n an puhnaah dan bawhchhiatna a awm loh thu a sawi thung.

Party pahnihte chuan, 'The Rules of Procedure and Conduct of Business in Mizoram Legislative Assembly' angin Assembly committee pakhat aia tamah MLA-te member an nih theih loh laiin MLA 16 chu committee pakhat aia tamah member an nih thu an tarlang. Minister-te committee-a member nih khap a nih laiin portfolio nei minister of state rank leh status nei MLA palite committee hrang hranga an tel thu te, Ethics Committee-ah government chief whip/govt. whip tel khap a nih laiin whip chu member a nih thute an ziak lang tih an sawi.

PC leh AAP chuan, "Kan rama rorelna in sang bera hetiang nasa taka dan bawhchhiatna a awm hi a pawi kan tiin a ṭha lo kan ti tak zet... Heng dan bawhchhiatnate hi tihtawp nghal a nih theih nana hma la tur emaw, hamṭhatna insiam sak nana hetianga kal hi a ṭul a nih chuan dan hi siamṭhat a nih nana hma la turin Assembly Speaker leh ZPM VUC kan ngen ta a ni," an ti.

Hetih lai hian, Assembly speaker Lalbiakzama chuan, PC leh AAP-te'n an puhnaah dan bawhchhiatna a awm loa a hriat thu a tarlang.

Speaker chuan, hun la awm zel turah ram tana ṭha zawk leh rawtnate a awm chuan an inhawn reng thu te, dan bawhchhiaa hriatna a awmin an ngaihthlak theih reng thu te, sawiho hmasak a, a nihna tihchian phawt hnuah mipui hriatah thehdarh ni ta chauh ṭhin se ṭha a tih thu a tarlang bawk.