MYC buatsaih hna zawnna tura duan hawn a ni

Mizoram Youth Commission (MYC)-in hna zawngtute leh thawktu tur zawngtute tana job portal an siam, Hna Inpui tih chu October 9, Zirtawpni zan khan Labour, Employment, Skill Development and Entrepreneurship (LESDE) minister Lalchhandama Ralte-in a hawng.

Lalchhandama Ralte chuan, Mizorama a vawi khatna leh a hmasa ber atana MYC-in Hna Inpui an siam chu lawmawm a tih thu sawiin, "Hna neitu leh hna mamawhte intawhna hmunpui hian hna zawn leh inrawih danah thil a thlak danglam ka beisei," a ti a; lehkhathiam leh thiam lote'n an thiam záwng leh theih zawng mila awlsam zawka hna an hmuh theih chuan, a ṭha zawnga thil a inthlak danglam a beisei thu a sawi.

MYC chairman Dr Vanlalṭanpuia chuan, Hna Inpui chuan Mizorama hnathawh dan kalphung a thlak hlawk thei dawn nia sawiin, "A bikin thingtlang lam aṭanga zirna vanga khawpui lama awmte tan an remchan hun ang zelah hna an thawk thei tawh dawn a ni," a ti.

Hna Inpui hi mobile phone-ah Google Playstore aṭangin download theih a ni a, thiamna chi hrang hrang nei hna zawngtute'n an thiamna milin an inziak lut thei a, hna thawktu mamawhtute'n an mamawh milin thawktu an zawng thei bawk dawn a ni.