Assam commando camp siamna Mizote ram enkawl chin aṭangin a hlá - Home Secretary

28th May, 2024

Home secretary H Lalengmawia chuan nimin khan Chief Secretary conference hall-a thuthar thehdarhtute a kawmnaah, Assam sorkarin commando camp an siamna hmun chu Mizote'n an enkawl chin ram/hmun aṭanga a hlat thu a sawi.

Assam-in commando camp an siam tih chu media aṭanga an hriat thu sawiin H Lalengmawia chuan, "Chiang takin kan hre lo. Kan hriat danin, forest clearance an lâk loh avangin Ministry of Environment, Forest and Climate Change (MoEFCC) chuan siam chhunzawm tawh lo turin an hriattir," a ti.

Home Secretary chuan, Assam CM-in dan loa Mizoram aṭanga an ram luah ṭhin (encroach)-te vênna tur tiin MoEFCC hnenah camp siam phalna an dil tih an hriat thu sawiin, "Kan buaina tur vak a awmin kan hre lo. Assam leh MoEFCC inkar a ni," a ti a, zuk ngaihven chiam ṭul lem loa an hriat thu a sawi.

Assam-in 'encroach' tih ṭawngkam an hmang erawh an helh thu sawiin Lalengmawia chuan, "State pahnihin ramri kan chinfel hmaa encroach tih ṭawngkam hman hi a dik lo. Hei hi chu ṭha kan ti lo a, ramri chinfel ni tawhin, kan rîn fel chinah hma la ila chuan thu hran," a ti.
Home Secretary chuan, Assam chêt dan ngaihven chiam ṭul an tih loh rualin, hriat tura pawimawh chin chu an ngaihven ve reng thu sawiin, "Tuna an camp siamna hmun hi Mizote'n hma kan lâkna chin aṭang chuan a la hla viau," a ti a, Assam leh Mizoramin buaina an neihna ṭhin aṭang pawhin a la hlat thu a sawi.

H Lalengmawia chuan, ramri chingfel turin theihtawp chhuah zel a nih thu sawiin, "Vawi tam kan inhmuh bakah, lehkha pawh vawi tam kan inthawn. Mahse, a la fel thei rih lo," a ti.

Home Secretary chuan, February 2024-a Assam leh Mizoram CM an inkawmnaah ramri chinfel lam sawi an duh thu sawiin, "Assam CM hian high level team rawn tirh a tum thu a sawi. Inthlan a ni chho nen, a la rawn tir thei lo a nih hmel a, a àwm tho," a ti a, inthlan zawhah a rawn tirh an beisei thu a sawi.

MoEFCC chuan, Assam sorkarin commando camp siam a tumnaah forest clearance tel loa commando camp siam phalna petu Assam PCCF hlui, tuna Assam special addl. chief Secretary (Forest) MK Yadav thil tih chu dan kalhah ngaiin, May 14, 2024 show cause notice a pe a, a laka court-ah thubuai an thehluh loh chhan sawifiah turin ni 60 chhung hun an pe.

Hetih lai hian, Assam CM Himanta Biswa Sarma chuan EFCC minister Bhu-pender Yadav hnenah April 13, 2024 khan lehkha a thawn a, inrawlh turin a ngen.

Assam CM chuan, commando camp tel lo chuan an ramngawte ven him theih a ni loh thu sawiin, "Kum 2021-ah Mizoram leh Assam ramria intihbuainaah Assam police paruk an thi. Chuvangin, forest vawn himna atan mai ni lo, Inner Line Reserve Forest ven himna atan commando camp siam a ngai a ni," a ti.