Kawng laihnaah tui lakna tihchhiat vanga Saichal khaw tui harsatna chingfel

Centre for Environment and Social Justice (CESJ) chuan, NH-102B Saitual-Khawkawn kawng laihnaah Saichal khaw tui lâkna tihchhiat a nih avanga Saichal khuain tuia harsatna an tawh chu chinfel thawkhat a nih thu an tarlang.

CESJ thuchhuah chuan, Saichal khuain tuia harsatna an tawh chu NHIDCL-in ram leilung fate a zahloh vang a nih thu tarlangin, "NH-102B kawng laihnaah Saichal khaw tui lâkna tihchhiat a nih avangin February 2024 aṭang khan Saichal khuain tui harsatna rapthlak tak an tâwk a, thla li chhung khan tui vawi hnih chauh sem a ni," a ti.

Kumin May thla chawhnu lamah NHIDCL-in in khat tan tui litre 1,000-in an sem tih sawiin CESJ chuan, "An la sem chhuak lo. An tui sem chu vawkbual tui anga nú, anmahni pawhin ei atana an duh loh a ni," an ti a; Saichal khuaa rethei tak tak, tui leina nei lote pawhin a báin tui an lei a ngaih thu an sawi.

CESJ chuan, Saichal khaw mite'n an harsatna chu CESJ-ah ziakin an thlen avangin May 25, 2024 khan Saichalah an kal a, Saichal VC, PHE Watsan leh NHIDCL hnuaia contractor leh NGO-te nen inkâwmin, tuia harsatna sutkian dan tur an sawipui tih an tarlang.

Saichal khawtlangin harsatna an tawh chungchang an bialtu MLA, minister ni bawk hnena an thlen ṭula a lo chhàn dan an dem tih sawiin CESJ chuan, "MLA chuan NHIDCL leh PHED inremna awm sa anga kal a ngaih thuin a chháng. MLA hian ni khat pawh tui nghei hrehawm rapthlakzia a hre lo ni ngeiin a lang. A hre lo a nih pawhin a biala mihringte tawrhna avangin a ngaihsak tur a ni. Saichal bialtu MLA hian NHIDCL hnena khawtual mite tui pe tura hrilhhriat chu a tih turah kan ngai," an ti.

CESJ TARLAN DANG ṬHENKHAT

☑ PHED E-in-C ah kan thlen. NHIDCL-in Saichal tui lakna an tihchhiat siam that lehna turin cheng nuai 100 vel an ruahman a, tui kawng siam chu PHED lamin an thawk ang tia inremna chu, tun thlenga tihfel a la nih loh avangin May 27, 2024 hian PHE E-in-C hnenah CESJ leh NHIDCL-te nen kan sawiho.

☑ CESJ chuan NHIDCL hnuaia contractor-te hnenah Saichal khaw tui lâkna pipe siamṭhat a nih hma zawng a mamawh apiang hnenah ni tin tui thianghlim in tlak tanker-a sem turin kan ti a, kan phût angin May 26 zing aṭangin tui sem tur an phur lut.

☑ Khaw tinin hmasawnna kan duh a, chutih rual chuan, mahni ram leilung leh a hausakna humhalh ngam lo khua kan ni tur a ni lo. Hmasawnna hnathawh hian mipui harsatna a siam tur a ni lo. Khawtual mite'n harsatna an tawh chuan DC/BDO-te hnenah complaint thehluh ṭhin tur.

☑ Kawng laihna leivûng paih duhdah vanga lui leh ramngawin a tawrh dawn chuan an hnathawh pawh tihtawpsak ngam tur a ni.