Indiaskills 2024-a medal latute CM-in lawmpuina thingpui a inpui

National Skill Competition - Indiaskills 2024-a medal latu Mizo pariatte chu nimin khan chief minister Lalduhoma'n CMO-ah lawmpuina thingpui a inpui a; Hand Holding Policy (bána kaih) hnuaiah sorkarin a thawhpui theih thu a hrilh.

CM Lalduhoma chuan, Indiaskills 2024-a medal late chu a chhuan thu hrilhin, an kal zelna turah duhsakna a hlan. Mahnia hma an lak tak tak dawnah Hand Holding Policy hnuaia thawhpui theih an nih thu hrilhin, "Mizo ṭhalaite zingah thiamna leh theihna hlu tak tak nei an tam a, chu'ng mite zawn chhuah chu a pawimawh hle. A thiam leh theite chu sorkarin bána kaih policy hmanga thawhpui a duh a ni," a ti.

Hand Holding Policy hnuaia sorkarin a thawhpui theihte chu beneficiary an tih dawn loh thu sawiin Lalduhoma chuan, "Business partner kan ti ang. A thlàwna sem lam kalsanin, hlawhtling ngei turte thawhpui kan tum," a ti a; kumin bikah zau takin hma an la thei dawn rih lo a, nakkum aṭangin nasa zawka kal an tum thu a sawi.

Labour, Employment, Skill Develop-ment & Entrepreneurship minister Lalnghinglova Hmar pawhin thu sawiin, inbuatsaihna hun an ngah lo chunga mi pariatin lawmman an dawng chu lawmawm a tih thu a sawi a, "Kum 2026 intihsiak awm leh tur atana inpuahchah a phûrawm hle. Lawmman latute hi kan ITI leh Women Polytechnic-a zir chhuakte an ni hlawm a, kan institution-te ṭhatzia an pho lang a ni," a ti.

CM-in a lawmpuina hunah hian medal latute chu sorkarin lawmpuina sum (incentive) pek a tum thu tarlan a ni a; LESDE secretary Lalmalsawma Pachuau leh director Angela Zothanpuii te pawhin thu an sawi.

Indiaskills 2024-a gold medal latu zinga khawvel huap intihsiaknaa India ram aiawha tel tur mi pahnih chuan vawiin hian Mizoram an chhuahsan ang a, national camp an zawm dawn a ni.