Siaha Dist. Hospital-ah damlo enkawl tur doctor awm loh thu MLA-in Minister a hrilh

Siaha bialtu MLA Dr K Beichhua chuan, a bial chhunga mi Lenchii (90), Siahatlah-III chu a chetsual avangin Siaha District Hospital panpui a ni a, enkawltu tur doctor a awm loh avangin rilru na takin in lamah an haw leh thu a tarlang.

Thil thleng chungchang hi Dr K Beichhua chuan nimin khan Health minister Lalrinpuii hnenah lehkha thawnin a hrilh a, "May 26, Pathianni zing dar 6-ah Pi Lenchii chu accident avangin Siaha District Hospital emergency panpui a ni a, rilru natthlak takin dar 2 thleng doctor tu mahin an attend lo a ni awm e. Hei vang hian a chhungte lungawi lo chuan rilru na takin casualty aṭangin in lamah an inla let ta mai a. Hei hi ka hriatin, ka biala thil thleng a nihna angin a pawi ka ti," a ti a, Lianchii chu a lainat thu a tarlang.

Siaha district chu district upa leh damdawi-in pawh Mizorama upa ber zinga mi a nih thu tarlangin K Beichhua chuan, "Sorkarin min ngai pawimawhin, a theih chinah doctor ṭha tak tak pawh min dahsak a, lawmawm ka ti hle. Chutih rual chuan, he thil thleng hi medical negligence a niin a lang a, kan hma lama kan kal zelna turah thleng nawn tawh lo tur leh kan doctor-te pawhin mipui rawng ṭha zawka an bawl theih nan min lo hriatsak a, a ṭul anga hma min laksak turin i hnenah ka rawn thlen e," a ti.

Siaha MLA thu thlen chungchang hi chhui chiang turin Health minister Lalrinpuii chuan nimin khan Health department hotute a hrilh a; thil awm dan an hriat hnuah nimin chawhnu khan a pisaah Health department hotute a ṭhutkhawmpui bawk. Health Minister chuan, thil thleng chu pawi a ti a, tun hnuah thlen nawntir lo turin a hriattir a ni.