Chite lui humhalh dan tur sawiho

Save Chite Lui hruaitute chuan nimin khan chief minister Lalduhoma a pisaah an kâwm a, Save Chite Lui hmalak tawhnate leh hmachhawpte an hrilh a, Chite lui humhalh dan tur an sawiho.

Save Chite Lui hruaitute chuan, Chite lui humhalh turin kum 2007-a hma lak ṭan a ni a, kum 2017 aṭangin awmze nei zawka kalpui a nih thu an sawi a; Comprehensive Action Plan-a ruahman angin hmalakna kalpui a nih thu leh Action Plan Phase-I zawh chhoh mek a nih thu CM an hrilh.

Chite lui chu Indian Army-in adopted river atan an thlan thu te, Prime Minister radio programme Mann ki Baat-ah tarlan a nih thu leh chumi avang chuan sorkar laipui aṭangin duhsakna leh chhawmdawlna tam tak a awm theih thute an sawi a; Save Chite Lui movement avangin Mizo mipui thinlungah lui humhalh duhna a pian thute an sawi bawk.

Inkawmnaah hian Save Chite Lui Action Plan Phase-II angin riverfront development atan sorkar laipui aṭanga sum hmuh dan tur te, Bawngkawn rama Chite lui hnár aṭanga Bethlehem Vengthlanga Chite lei thlenga Chite lui kam tuak rîral zel tur vênna tura lung rem dan turte sawiho a ni.