Mizoramah rúltuha chi dang an hmu chhuak

Mizoram University (MZU) Zoology department-a hotu Prof. HT Lalremsanga leh research scholar-te chuan Mizorama rûl an zirchiannaah, India rama rúltuhâ la hmuh ngai loh Mizoramah tun hnai khan an hmu chhuak.

MZU Zoology department mite'n rultuha an hmuh chhuah thar hi Trimeresurus uetzi tih a ni a; an thil hmuh chhuah thar chanchin chu Indian Biodiversity scientific journal lian ber, Journal of Threatened Taxa Volume 16 issue no.5-ah May 26, 2024 khan tihchhuah a ni.

Thu dawn danin, Trimeresurus uetzi hi rultuha chi khat, váng tak a ni a, kum 2023 khan German, Vietnamese leh French scientist-te ṭanghoin Myanmar rama Mandalay, Sagaing, Magway, Bago, Chin state leh Shan state aṭangin rúl chi thar a ni tih an hmu chhuak.

Trimeresurus uetzi chu a lan danah chuan rúltuha pangngai (Trimeresurus erythrurus) nena inang tak leh hriat hran har tak a ni a, cryptic species an ni. An DNA leh phuhlip zir chian aṭangin an danglamna eng emaw zat a awm thung.

Myanmar-ah chauh Trimeresurus uetzi a awm emaw tih a nih laia Mizoramah a awm ve reng tih hmuh chhuah a ni chu a hlu hle nia sawiin MZU Zoology hotute chuan, "India ram chhunga rultuha (Trimeresurus) species chi hrang record awm sa 20 ni ṭhin kha 21 a ni dawn ta. Mizoram bikah chuan kum 2022-a Champhaia hmuh chhuah tawh Trimeresurus mayaae tiamin rultuha species pali record kan nei ta," an ti.

MZU Zollogy department chuan, rultuha chi dang hmuh chhuah thar chuan Mizoram leh a chhehvel chu continental drift avangin Indian subcontinental leh Asia chhimchhak insuih finna lai a nih avangin nungchaah a hausakzia a tichiang niin an tarlang.