Naupang venhimna dan zirho

Nimin khan Kolasib DC conference hall-ah hursualna laka naupang venhimna lama thawktu office leh tlawmngai pawl hrang hrang hruaitute tan ‘Protection of Child from Sexual Offences (POCSO) Act 2012’ zirhona buatsaih a ni.

Zirhona kaihruaitu Kolasib bawhsap John LT Sanga chuan, khawtlang nuam siam turin naupangte zalenna leh himna hmun ngaihtuah tel a pawimawh thu a sawi a, "Naupang venhimna dan kan neihte kan hriat chian a ngai," a ti.

Bawrhsap chuan, hursualna vanga naupang nun kawng thui tak a chhe zawnga nghawng thei thil duhawm loh thleng tur vên nan leh hursualna lam thil tite man chhuah leh hrem an nih ngei theih nan POCSO Act 2012 zirtirna neih a pawimawh thu a sawi bawk.

Zirhonaa tarlan danin, kum 2016 aṭanga 2024 thlengin POCSO Act hnuaiah thubuai 126 ziah luh a ni tawh a, chu'ng zinga pawi khawihtu tam zawk chu kum 18 hnuai lam an ni.

Naupangin ngaihven an hlawh lohna chhungkua, eizawnna vanga inchhung khura puitlingin fate an uap tam lohna chhungkua, ruih theih thil vanga chhungkaw buai leh nu leh pate vilpui loha naupangin phone an khawih tamna chhungkuaah POCSO thubuai a tam deuh niin a lang.

Kum tling lo zingah bawk POCSO Act kaihhnawih buaina a tam avangin zirna-in leh kohhran kaltlanga inzirtirna kalpui a pawimawh thu sawi a ni a; hemi kawngah hian mithiamte'n naupang kum bithliah dan azirin zirtirna pek ni se an ti.