Mizorama Kristian chêp lai ber Congress-in India an kaihhruai lai - BJP President

BJP, Mizoram Pradesh president Vanlalhmuaka chuan nimin khan an party pisaa political session-ah thu sawiin, Mizorama Kristiante an chep hun lai ber chu Congress party-in India ram an kaihhruai hun lai a nih thu a sawi.

Vanlalhmuaka chuan, "Kan ram leh hnam, kan sakhua a him loh lai ber chu Congress party chak vanglai, Indira Gandhi hun lai kha a ni. Dawhkân kîla sawifel theih mai tur a nih lai a, March 5, 1966-a jet fighter hmanga min rawn bomb kha Mizo mipui hian kan theihnghilh mai mai dawn lo. Biak-in pawh min zahsak lo a, inkhawm pawh kan duh hunah kan nei thei lo a nih kha. Mizo Kristiante'n tihduhdah kan tawrh nasat hun lai dik tak kan hriat chian a, kan ngaihtuahna kan sen a ngai," a ti.

Mizote Jerusalem - Mizoramah ṭam a tlak tlat avangin Zo hnahthlak ram danga awmte harsatna vanga an rawn chángin sorkar laipuiah kut dawh a ngai nghal ṭhin nia sawiin BJP President chuan, "Mizoram hi Zo fate Jerusalem tak tak tura buatsaih hi BJP Mizoram chuan kan tum a ni," a ti a; 'Mizoram first' tih chu an thupui ber a nih thu a sawi.