KHAWTHLIR

Tanpuina hlan

United States of America-a Zo hnahthlak zinga Baptist kohhrana láwite intél khawm, Zomi Baptist Churches of America hruaitute chuan Myanmar, Bangladesh leh Manipur buaina vanga Zo hnahthlak harsatna tâwkte chhawmdawlnaa a ṭula hman atan Central YMA hnenah May 26, Pathianni khan Rs 2,00,000 an hlân. Sum hi ABCA aiawhin BCM administrative officer Lalruatkima'n CYMA president Lalhmachhuana hnenah a hlân a ni.

Kuhva rah man

Assam Rifles chuan May 26, Pathianni khan Champhai leh Tlangsam inkar kawngah ram dang aṭanga lak luh kuhva rah ip 165 (kg. 13,200) an man a, poppy seed kg. 7,740 an man bawk. AR sipaite thil man hi cheng vbch 1.15 hû a ni a, dan anga bawhzui turin Champhaia Customs hnenah an hlân a ni.

Truck-in su hlum

Lallawmkima (38) s/o Saizinga, Bilkhawthlir Kualmawi chu nimin chawhma dar 9:50 vel khan truck-in a su hlum. Thu dawn danin, Lallawmkima hi Bilkhawthlir aṭanga Vairengte panin bike-in a tlan a, Ram Brahma (54), Dispur, Assam khalh truck-in a hnung aṭanga súin, a chîl zui a, ká chhawn loin a thi. Truck khalhtu hi police-in an man.

DC-in kâwm

Champhai District Level Committee on Myanmar and Bangladesh Refugees chairman James Lalrinchhana, DC chuan nimin khan Myanmar ráltlânte chhawmdawlna pek chungchang relief agency hrang hrang a sawipui. Bawrhsap chuan, tun hnaiah Vaikhawtlang, Khuangphah leh Hnahlanah ráltlân lut thar mi eng emaw zat an awm thu tarlangin, relief agency-te chu raltlante chhawmdawlnaa thawhhopuiah a sáwm.

MIAS sawiho

Chief minister Lalduhoma hoin nimin khan Chief Minister Office-ah Mizoram Institute of Advanced Studies (MIAS) chungchang - MIAS tuaithar leh dan tur te, ṭangkai zawka hman dan tur leh a kal zelna atana hmalak dan turte sawiho a ni. MIAS hi Mizorama multi-disciplinary research institution dinna tura ruahmanna a ni a, a kal zel dan tur chhâwng li duan a ni.