KHAWTHLIR

Evangelical Church of Maraland (ECM) kohhrana Siaha pastor bial KTP chuan October 10, Inrinni khan thisen pek rûnpui an huaihawt a, mipa 42 leh hmeichhia pasarihte'n Siaha District Hospital tan thisen unit 49 an pe.

Mizoram Synod hnuaia inkhawmpui lian ber dawttu, Presbytery inkhawmpui chu October 8 aṭang khan hmun hrang hrangah neih a ni a, nimin khan a ṭiak. Covid-19 léng vangin Presbytery tinte inkhawmpuia hun an hman dan a inang vek lo a, a tlangpuiin Zirtawpni leh Inrinni khan rorel inkhawm neiin, nimin khan kohhran upa tharte nemnghehna leh upa thite sûnna inkhawm neih a ni. Inkhawmpuiah hian zan lamah inkhawm neih a ni lo.

Siaha DC Kesavan R chuan October 10, Inrinni khan a pisaah MADC chhung village council pariata by-election neih tura hman tur final electoral roll a tlangzarh. VC by-election neihna turte chu - Meisavaih East, Meisavaih West, New Colony-III, College Vaih-I, Siahatla-I, Ahmypi, Phúra South leh Khopai-te a ni a; VC pariatah hian voter 5,029 (mipa 2,331 leh hmeichhia 2,702) an awm a ni.

Aizawl West-II bialtu MLA Lalruatkima, minister of state chuan October 9, 2020 khan a bial chhung Tuikual North-ah Anganwadi Centre-II a hawng. Minister chuan, ram hmasawn leh hrisel ni turin pian tirh aṭanga inkaihhruaina ṭha leh inenkawlna mumal a pawimawh thu sawi­in, "Sorkar laipuiin mipui hriselna ngai pawi­mawhin, nuin nau a pâi aṭanga an tar thlenga a bik enkawlna tur scheme pawimawh tak a siam a, anganwadi centre hi chu'ng zinga mi chu a ni,"  a ti.

State referral Hospital (ZMC)-ah nimin chawhma lam khan Covid-19 vei mi pasarih dah luh an ni a, anni nen SRH-ah hripui vei vangin mi 17 enkawl mek niin, ICU-ah pahnih an awm. SRH-ZMC Bulletin tarlan danin, enkawl mekte hi mipa 10 leh hmeichhia pasarih, Mizo 14 leh hnam dang pathum an ni a, a naupang ber thla 8 mi a nih laiin, a upa ber chu kum 70 a ni. An zingah ngaihtuahawm an awm lo.