CM-in chhiatna thlenna hmun a tlawh; Chhawmdawlna atan cheng vbc. 15 dah a ni

Chief minister Lalduhoma chuan nimin khan Aizawla chhiat­­na thlenna hmunte a tlawh a, khuarèl chhiatnaa thite chu Mizoram sorkarin Rs 4,00,000 ṭheuha a ràl dawn thu leh chhiat­na thlenga chhawmdawlna leh a ṭula hman atan cheng vbc. 15 rua­hman a nih thu a puang.

Chhiatna thleng leh chhawm­dawlna pek dan tur nimin chawhma khan CM Lalduhoma hoin Aizawl DC Conference Hall (DDMA Control Room)-ah sawiho a ni a; Disaster Mana­ge­ment & Rehabilitaton minister K Sapdanga, chief secretary Dr Renu Sharma, DMR secretary K Lalrinzuali, secretary to CM Vanlaldina Fanai, Aizawl bawrhsap Nazuk Kumar leh sorkar mi pawimawh dangte an tel.

Chief Minister leh DMR Minister bakah, minister of state Lalnghinglova Hmar, MLA Lalmuanpuia Punte leh Baryl Vanneihsangi te chuan nimin khan Melthum leh Hlimena leiminin mi eng emaw zat a chhilh­na hmun an tlawh.

CM Lalduhoma chuan a tlawh laia ruang lak chhuah tawh 12 zinga Mizo pariatte sorkarin a ràlna (ex-gratia) hmahruai atan Rs 2,00,000 ṭheuh a hlan a, mitthi chhungte aiawhin Melthum Local Council chairman Saihmingliana'n a dawng.

Lalduhoma chuan, mitthite chu sorkarin Rs 4,00,000-a a ràl vek dawn thu tarlangin, ràlna hmahruai Rs 2,00,000 bakah, Rs 2,00,000 dang chu chhiatna report kimchang a luh hnuah pek leh tur a nih thu leh, hnam dang thite chu an bank account-ah thun a nih tur thu a sawi.

CM chuan, ruang la hmuh lohte pawh lâk chhuah an nih veleh ràlna hmahruai Rs 2,00,000 pek nghal theih turin DMR depart­ment-in rua­hmanna a siam fel vek tawh thu a tarlang a; Mel­thum khawtlang hruaitute leh Central YMA hruaitute hmalak zel dan tur a sawipui nghal a ni.

Chief Miniser hian Melthum YMA hruaitute hnenah a ṭula hman atan Rs 50,000 a pe a; Kanan Veng thlanmual min a tlawhnaah YMA hruaitute hnenah Rs 50,000 a pe bawk.

Lalduhoma chuan, thlipui leh ruahin hmun hrang hrangah chhiatna a thlen leh, mitthi, in leh lo chan leh harsatna dang tawk tam tak an awm chu pawi a tih thu social media-ah a tarlang a, "District Disaster management Authority tinte theihtawp chhuaha hma la turin ka ngen a, tlawmngai pawl leh mi tin a thei apiangte ṭanpui ngaite ṭanpuia che chhuak turin ka sawm a ni," a ti. Chhiatna nasa zawk a thlen zel loh nan fimkhur turin mi tin a ngen.