Veng 60 chuangin kawlphetha nei lo; Kawlphetha chhia siamin theihtawp chhuah

Power & Electricity minister F Rodingliana chuan Cyclone Remal vanga Mizoram hmun hrang hranga kawlphetha pekna chhiate chak zawka siamṭhat a nih theih nan nimin khan a inah PE department hotute emer­gency meeting a neihpui. Nimin khan Aizawlah feeder 33 châwmtu power sub-station 10 a chhia a, veng 60 chuangin kawlphetha an nei lo tih an tarlang.

Ṭhutkhawma tarlan danin, Aizawl khawpuia kawlphetha pekna kháwl leh hrui (line) chhia tam tak chu nimin zing aṭang khan ruahsur leh leimin karah siamṭhat hna thawh nghal a ni a, hmun ṭhenkhat erawh chuan leimin leh ruahsur nasa vangin siam mai a harsa a, theihtawp chhuahin hna thawh mek zel a ni.

Cyclone Remal vang hian nimina ṭhutkhawm lai dinhmun angin, Aizawlah feeder 33 châwmtu power sub-station 10 a chhia a, veng 60 chuangin kawlphetha an nei lo. Leiminin transformer a minpuite leh panel board eng emaw zat chhia a awm.

Mamit district-ah electric ban leh 33kV line leh 11kV line chhia a chhia a, Kolasib district-ah 132kV, 33kV leh 11kV eng emaw zat a chhia a; Lunglei, Lawngtlai leh Siaha district-ahte kawlphetha pek theih a ni rih lo. Serchhip district erawh chu Saitual (via East Lungdar) aṭangin kawlphetha pek a ni a, hmun dang pawh hrui kawng dang hmanga pek theih dan zawn zel a ni.

Minister F Rodingliana chuan, "Hmanrua indaih lohte hmun hrang hrang aṭanga lak khawm dan ngaihtuah a, a ṭul anga RDSS scheme aṭang pawha hmanrua pawh a, a rang lama siamṭhat hna thawh chhunzawm nan sum awm ang ang zawn nghal ni se," a ti.

LT leh HT line chhia hmun tam takah a awm tih sawiin Minister chuan, "PE department-a thawk­tute'n ruahsur karah pawh nunna tana hlauh­awm khawpa an thawh­naah lawmthu ka sawi a, department lamin theih­tawp chhuahin, châwl loin hna an thawk a ni tih hre reng chungin dawhthei taka hrethiam turin mipui ka ngen a ni," a ti a; sum awm lo chung pawha tih dan kawng zawn zel a nih tur thu a sawi.

Nimina ṭhutkhawmah hian engineer-in-chief H Zonunsanga leh PE department hotu dangte an tel a; ṭangkai zawka customer care centre (CCC) hman dan tur an ngaihtuah nghal bawk.