Tui pump a mumal thei rih lo; ruahtui khâwl turin mipui ngen

Public Health Engineering (PHE) depart­ment chuan thuchhuah siamin, May 27, 2024 aṭanga nasa taka ruah a sûr avangin Tlawng lui lianin Aizawl châwmtu tui pump-na a chîm avang leh power supply-ah harsatna a awm avangin hun eng emaw chen Aizawl khawpuiah tui sem a khaihlak dawn tih a tarlang a, tui ren tur leh ruahtui khâwlah ṭan la turin mipui an ngen.

PHE department chuan, Aizawl châwmtu Reiek kaia Tlawng lui tui pump-na, Greater Aizawl Water Supply Scheme phase I-a tui pump-na khawl chu Tlawng lui lianin a chîm tih an tarlang a, "Hei vang hian GAWSS-I aṭangin tui pump theih a ni dawn rih lo a, GAWSS-II pawh power supply-ah harsatna a awm avangin tui pump a mumal thei dawn lo," an ti.

Aizawl veng hrang hranga leiminin tui sem chhuahna pipe a tihchhiat avangin tui semnaah harsatna tawh mek a nih thu tarlangin PHE department chuan, "Hemi avang hian Aizawl khawpuiah tui sem lamah hun eng emaw chen harsatna a awm dawn a, mipuite'n lo hrethiam a, ruahtui khâwl lama ṭan lo la zel turin kan inngen e," an ti bawk.

Thu dawn danin, GAWSS Phase I-a tui pump-na khawl chu nimin khan tuilianin a chîm pil vek a, Mechanic Store leh Electrical Store bang thlang lam tuilianin a la vek. Pump house duty room chu feet chanve vel chauhin tuiin a chîm lo a, pump house-a khawlte ft. 1 velin tuiin a chîm a ni.