Thlànmual minah thlàn 250 chuang a chhia

May 27, Thawhṭanni aṭanga ruahsur nasa vangin nimin khan Aizawla thlànmual ṭhenkhat a min a, thlàn eng emaw zat a chhia.

Nimin zing khan ITI Veng thlànmual chu nasa takin a min a, mual pahnih tawlhin, thlàn 200 vel a chhia.

YMA, ITI Veng Branch chuan, thlànmual minna huam chhunga chhungte phûm tawhte chu ITI Veng Thlànmual Inah inhriattir turin an ngen.

ITI Veng YMA hruaitute chuan, nimina ruah a la sûr avang leh lei tawlh a la awm avangin thlàn an la senghawi lo a, tarpauline-in an khuh ringawt rih tih an sawi.

Aizawla Kanan Veng thlànmual pawh nimin zing khawvar hma khan nasa takin a min a, thlân eng emaw zat a chhia.

Thu dawn danin, thlànmual minna hmun hi Ebenezer Medical Center ep, Tuikual lui fintu luikawr chhakah a ni a, mi 59 phûmna thlàn 55 a chhia. Thlàn chhiate chu nimin khan Kanan Veng khawtlangin a theih ang angin an senghawi a, nimin khan kuang leh ruhro eng emaw zat an an la chhuak hman a ni.

Kulikawn thlànmual leh Chawn­pui thlànmual pawh nasa vak loin a tawlh nia thu dawn a ni bawk.

Aizawl West-II bialtu MLA Lalnghinglova Hmar, minister of state chuan a bial chhung Kanan Veng thlanmual hi a tlawh a, hnatlangte thingpui inna atan Rs 15,000 a pe.