Rél siamna bungrua himna tur sawiho

Kolasib district bawrhsap John LT Sanga kaihhruaiin May 27, Thawhlehni khan Kolasib district-a North East Frontier Railways hma­lakna leh harsatna te, rél kawng siamna bungrua dahṭhatna rintlak siam dan tur leh uluk zawka vil dan turte sawiho a ni a; bungraw bo ṭhin avangin police-ah FIR 27 a lut tawh tih tarlan a ni.

Ṭhutkhawmnaah hian rél kawng siamna hmanrua vawi eng emaw zat a bo tawh avangin first information report (FIR) Bairabi Police Station-ah 10 leh Kawnpui Police Station-ah 17 thehluh a nih tawh thu an tarlang a; bungraw bote hmuh lêt a nih theih nan theihtawp chhuah a nih thu an tarlang bawk.

Bungraw lian tham tak tak bo a awm ṭhin avangin pawi khawihtute chu páwn lam mi an nih theih thu sawi a ni a; bungraw dah­ṭhatna rintlak tak siam dan tur leh uluk zawka vil dan turte an sawiho.

NEF Railways-a thawkte chuan, Bairabi khaw bula tunnel no. 1 aṭangin electric wire tam tham tak leh bulb eng emaw zat a bo thu an sawi bawk.

Kolasib district thu­neitute chuan, rél kawng siamna bungrua bo ṭhinah theihtawp an chhuahpui zel tur thu Railways mite an hrilh a, an harsatnate a hmunah DC leh SP-te'n an enpui dawn.

July 2024 chhunga Hortoki thlenga rél luhtir tura NEF Railways hmalakna chu lawmawm an tih thu sorkar hotute chuan an sawi a; rélin a paltlang tur khaw mipuite pawh lo inhmakhua turin an chah a ni.